ليتسەنزياسىز پلاستيكالىق وتا جاساعان مەكەمەگە زاڭ قانداي جازا كەسەدى

استانا. KAZINFORM - دەنساۋلىق ساقتاۋ مينيسترلىگى Kazinform ساۋالىنا جولداعان جاۋابىندا ءتيىستى سەرتيفيكاتتار مەن ليتسەنزياسىز پلاستيكالىق وتا جاساعان مەكەمەنىڭ زاڭ الدىنداعى جازاسى قانداي بولاتىنىنا تۇسىنىك بەردى.

جاۋاپتا كاسىپكەرلىك تۋرالى، حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكستەر دەنساۋلىق ساقتاۋ مينيسترلىگىنىڭ مەديتسينالىق جانە فارماتسيەۆتيكالىق باقىلاۋ كوميتەتىنە تۇرعىنداردان پلاستيكالىق وتامەن بايلانىستى شاعىم تۇسسە، جوسپاردان تىس تەكسەرۋ جۇرگىزۋگە وكىلەت بەرەتىنى ايتىلعان. سونداي-اق ونىڭ اۋماقتىق دەپارتامەنتتەرى مەديتسينالىق قىزمەت كورسەتەتىن ۇيىمداردى مەملەكەت اتىنان باقىلايدى. مۇنداي جوسپاردان تىس تەكسەرۋ جۇرگىزۋگە مىنالار نەگىز بولۋى مۇمكىن:

- ادامنىڭ ومىرىنە نەمەسە دەنساۋلىعىنا زيان كەلتىرۋ، زيان كەلتىرۋ قاۋپىنىڭ ناقتى فاكتىلەرى بويىنشا پروكۋراتۋرانىڭ نۇسقاۋى؛

- ادامنىڭ ءومىرى مەن دەنساۋلىعىنا زيان كەلتىرۋدىڭ ناقتى فاكتىلەرى، سونداي-اق ادام ءومىرى مەن دەنساۋلىعىنا زيان كەلتىرۋگە اكەپ سوعاتىن قازاقستان رەسپۋبليكاسى زاڭناماسىنىڭ تالاپتارىن بۇزۋ تۋرالى مەملەكەتتىك ورگانداردىڭ وتىنىشتەرى؛

- قازاقستان رەسپۋبليكاسىنىڭ قىلمىستىق ءىس جۇرگىزۋ كودەكسىندە كوزدەلگەن نەگىزدەر بويىنشا قىلمىستىق قۋدالاۋ ورگانىنىڭ نۇسقاۋى.

«جوسپاردان تىس تەكسەرۋ ناتيجەلەرى بويىنشا وسى قىزمەت تۇرىنە سەرتيفيكاتى جانە (نەمەسە) ليتسەنزياسى جوق ادام زاڭسىز مەديتسينالىق قىزمەتتى انىقتاعان جاعدايدا اكىمشىلىك قۇقىق بۇزۋ تۋرالى كودەكستىڭ 424-بابى بويىنشا اكىمشىلىك شارا قولدانىلادى. ناقتىراق ايتساق، جەكە تۇلعالارعا 5 ا ە ك (18460 تەڭگە - رەد.) مولشەرىندە، لاۋازىمدى ادامدارعا 15 ا ە ك (55380 تەڭگە) مولشەرىندە، زاڭدى تۇلعالارعا 20 ا ە ك- تەن (73840 تەڭگە) 70 ا ە ك (258440 تەڭگە) مولشەرىنە دەيىن ايىپپۇل سالۋعا اكەپ سوعادى. اكىمشىلىك جازا قولدانىلعاننان كەيىن بۇل ارەكەت ءبىر جىل ىشىندە قايتالانسا، جەكە تۇلعالارعا دەنساۋلىق ساقتاۋ سالاسىنداعى ماماننىڭ كۋالىگىنەن ايىرا وتىرىپ، لاۋازىمدى تۇلعالار مەن سۋبەكتىلەرگە 30 ا ە ك (110760 تەڭگە) مولشەرىندە ايىپپۇل سالىنادى. اكىمشىلىك قۇقىق بۇزۋشىلىق جاساۋ ناتيجەسىندە الىنعان تابىسى تاركىلەنىپ، 65 ا ە ك- تەن 700 ا ە ك- كە دەيىنگى مولشەردە ايىپپۇل سالۋعا اكەپ سوعادى. دەنساۋلىققا ورتاشا جانە اۋىر دارەجەدەگى زيان كەلتىرگەنى ءۇشىن قىلمىستىق جاۋاپكەرشىلىك كوزدەلگەن»، - دەپ جازىلعان مينيسترلىك جاۋابىندا.