ليتسەنزيالىق تۋرنير: الىشەر ەرعالي جارتىلاي فينالدا قىتايداعى قازاق بالۋانمەن بەلدەسەدى

بىشكەك. KAZINFORM - قىرعىزستان استاناسى بىشكەك قالاسىندا كۇرەس تۇرلەرىنەن ءوتىپ جاتقان ليتسەنزيالىق تۋرنيردە قازاقستاندىق بالۋان الىشەر ەرعالي جارتىلاي فينالدا قىتايدا تۇراتىن قانداسىمىز ءابۋسايمان حابيلامەن بەلدەسەدى.

97 كەلى سالماقتا ەل نامىسىن قورعاپ جاتقان وتانداسىمىز الىشەر ەرعالي شيرەك فينالدا قىرعىزستان سپورتشىسى اندرەي ارونوۆتى 10:0 ەسەبىمەن جەڭىپ، جارتىلاي فينالعا جولداما العان بولاتىن.

ەندى ول پاريج وليمپياداسىنىڭ ليتسەنزياسى ساراپقا سالىناتىن اسا ماڭىزدى بەلدەسۋىن قىتايداعى قازاق بالۋانى ءابۋسايمان حابيلاعا قارسى وتكىزبەك.

قىتايدا تۇراتىن قانداسىمىز 2023 -جىلى استانادا وتكەن ازيا چەمپيوناتىندا كۇمىس جۇلدەگەر اتانعان بالۋان.

ءابۋسايمان حابيلا 1998 -جىلى 1-ماۋسىمدا قىتايداعى شىنجاڭ ولكەسىندە دۇنيەگە كەلگەن. 13 جاسىنان باستاپ ەركىن كۇرەس تۇرىمەن اينالىسا باستاعان.

ول 2021 -جىلدان بەرى قاراي قىتايدىڭ كۇرەس تۇرلەرىنەن ۇلتتىق قۇراماسىندا 97 كەلى سالماقتا ونەر كورسەتىپ كەلەدى.

ەستەرىڭىزگە سالا كەتەيىك، وسىعان دەيىن بىشكەك قالاسىندا كۇرەس تۇرلەرىنەن ءوتىپ جاتقان ليتسەنزيالىق تۋرنيردە ەركىن كۇرەستەن ءۇش قازاقستاندىق بالۋان جارتىلاي فينالعا شىققانىن جازعان بولاتىنبىز.

وليمپيادا ويىندارىنا ىرىكتەۋ ءتۋرنيرىنىڭ فينالدىق بەلدەسۋلەرى 17:00 دە باستالدى.

ايتا كەتەيىك، فينالعا شىققان ەكى بالۋان پاريج وليمپياداسىنىڭ ليتسەنزياسىنا يە بولادى.

اۆتور

كۇنسۇلتان وتارباي