ۇلىتاۋلىق جيھانكەز ەۋروپانى جاياۋ ارالاپ، رەكورد ورناتپاق
استانا. قازاقپارات - 76 جاستاعى تانىمال جيھانكەز سارسەنباي قوتىراشوۆ ەندى ەۋروپا ەلدەرىن جاياۋ كەزىپ وتپەك. Ulytaumen ەسىمىمەن تانىمال ساياحاتشى باس-اياعى ەكى ايدا سەربيا، ماجارستان، اۋستريا، گەرمانيا، فرانسيا باعىتىندا جاياۋ مارافون جاسايدى.
بۇعان دەيىن جيھانكەز ەلىمىزدىڭ 17 ءوڭىرىن ارالاپ، 8 مىڭ شاقىرىمدى ەڭسەرگەن ەدى. وسىلايشا قازاقستاننىڭ رەكوردتار كىتابىنا ەندى.
ال 2023 -جىلى س. قوتىراشوۆ اتىراۋ قالاسىنان شىعىپ، رەسەيدىڭ كاۆكاز ولكەلەرىنەن ءوتىپ، گرۋزيا ارقىلى تۇركيا رەسپۋبليكاسىنىڭ ىستانبۇل قالاسىنا جەتتى.
2024 -جىلى وسكەمەن قالاسىنان شىعىپ، التاي ولكەسى مەن مونعوليا ارقىلى قىتاي استاناسى بەيجىڭگە جاياۋ جەتكەن. ونداعى ماقسات - دۇنيەجۇزىلىك وركەنيەتكە كوشپەندىلەردىڭ قوسقان ۇلەسىن تانىتۋ، جىلقىنى العاش قولعا ۇيرەتكەن، دوڭعالاقتى، شالباردى، ەر-تۇرماندى ويلاپ تاپقان اتا-بابا ميراسىن دارىپتەۋ.
- ەۋروپا باعىتى - مەنىڭ ۇلكەن ساپارىمنىڭ جالعاسى. بۇگىن تۇندە سەربياعا ۇشىپ، كارى قۇرلىقتى 58 كۇندە ارالاپ، 26 ساۋىردە پاريجگە جەتۋدى جوبالاپ وتىرمىن. بىلتىر ساياحاتقا اقشا جەتپەي قالعانى راس. سەبەبى ماعان ۇكىمەت ەش قاراجات بولمەيدى. باستاعان ءىستى اياقسىز قالدىرۋعا بولمايدى. جالپى 40 مىڭ شاقىرىمنان اسا ءجۇرىپ، گيننەس رەكوردىنا ەنىپ، قازاقستاننىڭ اتىن الەمگە تانىتقىم كەلەدى. سەبەبى ەكۆاتوردىڭ ۇزىندىعى 40 مىڭ شاقىرىمدى قۇرايدى، وسى پەريمەردەن اسۋىم كەرەك. سوندىقتان كەزەكتى ساپارىما بارۋ ءۇشىن ءوز پاتەرىمدى ساتتىم، - دەدى س. قوتىراشوۆ ەلوردادا وتكەن كەزەدسۋدە.
ەۋوپادان كەيىن جيھانكەز اتاي امەريكا قۇراما شتاتتارىنا بارۋدى، اتلانت مۇحتىنىڭ جاعالاۋىنان تىنىق مۇحيتىنىڭ جاعالاۋىنا جەتۋدى كوزدەپ وتىر.
مۇنىمەن شەكتەلىپ قالماي، 40 مىڭ شاقىرىمنان اسۋ ءۇشىن افريكا، ورتا ازيا جانە باسقا كونتينەنتتەردى ارالاپ شىعۋ جوسپاردا.
گيننەستىڭ الەمدىك رەكوردتار كىتابىنا سايكەس، بۇگىنگى كۇنگە دەيىن 75 جاستان اسقان ادامنىڭ جاياۋ ساياحات جاساۋى بويىنشا مۇنداي رەكورد بولماعان.
- جولدىڭ بەينەتى دە از ەمەس. العاش ەل ءىشىن ارالاعانىمدا جەزقازعان- قىزىلوردا تراسساسى قيىنعا سوقتى. ەشبىر ەلدىمەكەن جوق، ءبىرلى- جارىم شايحانا، شارۋا قوجالىقتارى عانا كەزىگىپ، 420 شاقىرىمدى ون كۇندە ءجۇرىپ ءوتتىم. وڭتۇستىكتە تۇلكىباس اۋدانىنداعى جوعارى- تومەن اسۋلاردان ءوتۋ قيىن بولدى. تۇركيادا دا بيىك تاۋلاردى اينالۋ وتە كوپ ۋاقىت الدى. توتەسىنەن ءجۇرۋ ءۇشىن 3 شاقىرىمعا جەتەتىن ۇزىن تۋننەلدىڭ ىشىمەن ءجۇرۋ قاجەت بولدى. تۋننەلدىڭ ءىشى تاس قاراڭعى، تروتۋار جوق، بەتون قۋىستا كولىكتەردىڭ داۋىسى جاڭعىرىپ، قۇلاعىڭ بىتەلىپ قالادى. وسىلايشا ءۇش شاقىرىم تۋننەلدى 1,5 ساعاتقا ازەر ءجۇرىپ ءوتتىم، - دەپ ەسكە الادى ساياحاتشى.
گيننەس رەكوردىن تىركەۋ ءۇشىن ساياحاتشىعا ارنايى ترەكەر ىلىنەدى، سول ارقىلى رەكوردتى تىركەۋ ۇيىمى باقىلاپ وتىرادى.
ال تىلدىك كەدەرگىگە ۇشىراماۋ ءۇشىن س. قوتىراشوۆ ىلەسپە اۋدارماشى كومەگىن پايدالانباق.
- بالالارىم قۋانادى، «ءبىزدىڭ اتامىز - الەمدەگى جالعىز جيھانكەز قاريا» دەپ ماقتانادى. زامانداستارىما ايتارىم، ەڭ الدىمەن قيمىل كەرەك. قازىر قۇرداستارىمنىڭ اراسىندا بالداقپەن، تاياقپەن جۇرگەندەرى كوپ. ەگەر دەنساۋلىعىڭ مىقتى بولسىن دەسەڭ، شيرايمىن دەسەڭ، كۇن سايىن 7 ك م جاياۋ ءجۇر. قان اينالىم جاقسارادى، تازا اۋامەن دەمالاسىڭ، جان-جاعىڭدى كورەسىڭ، اركىممەن امانداسىپ، ءجون سۇراساسىڭ، ومىرگە قۇشتارلىعىڭ ارتادى. ادامدى قيمىل شيراتادى. 9 جاسىمنان بەرى وندىرىستە جۇمىس ىستەپ كەلەمىن، ءالى دە سول قۋاتپەن كەلە جاتىرمىن، - دەيدى س. قوتىراشوۆ.
بۇعان دەيىن اتىراۋلىق ساياحاتشى بەرىك ەسەنعاليەۆتىڭ الەمدەگى ەڭ سۋىق جەر سانالاتىن ويمياكون ەلدىمەكەنىنە بارعانىن حابارلاعان ەدىك.
اۆتور
ايجان سەرىكجان قىزى
