ەلىمىزدىڭ سۋ قويمالارى كوكتەمدە ەرىگەن قار سۋىن قابىلداۋعا دايىن با

استانا. KAZINFORM - كەلەسى جىلعى سۋ تاسقىنى كەزەڭىنە دايىندىق اياسىندا «قازسۋشار» فيليالدارى ەلىمىزدىڭ سولتۇستىك، باتىس، ورتالىق جانە شىعىس وڭىرلەرىندەگى سۋ قويمالارىندا بوس ورىندى قامتاماسىز ەتۋ بويىنشا جۇمىس جۇرگىزىپ جاتىر، دەپ حابارلايدى ق ر سۋ رەسۋرستارى جانە يرريگاتسيا مينيسترلىگىنىڭ باسپا ءسوز قىزمەتى.

بۇگىنگى تاڭدا قوستاناي، اقتوبە جانە باتىس قازاقستان وبلىستارىنىڭ سۋ قويمالارى جۇمىسىنىڭ كەستەسى ازىرلەندى. قوستاناي وبلىسىنداعى قاراتومار سۋ قويماسىنان سەكۋندىنا 50 تەكشە مەتر سۋ جىبەرىلۋدە.

اقتوبە وبلىسىنداعى قارعالى سۋ قويماسىنان سەكۋندىنا 15 تەكشە مەتر، اقتوبە سۋ قويماسىنان سەكۋندىنا 0,5 تەكشە مەتر سۋ جىبەرىلىپ جاتىر. بۇل رەتتە 23-تامىزدان 1-قازان ارالىعىندا اقتوبە سۋ قويماسىنان 107,1 ميلليون تەكشە مەتر سۋ جىبەرىلدى.

ب ق و- دا كيروۆ سۋ قويماسىنان سەكۋندىنا 3 تەكشە مەتر، بىتىك سۋ قويماسىنان سەكۋندىنا 13 تەكشە مەتر سۋ اعىزىلادى. دوڭگەلەك سۋ قويماسىنان سەكۋندىنا 6 تەكشە مەتر، پياتيمارسك سۋ قويماسىنان سەكۋندىنا 5 تەكشە مەتر سۋ جىبەرىلۋدە.

«باسقا وڭىرلەردەن ايىرماشىلىعى، قازاقستاننىڭ وڭتۇستىگىندەگى سۋ قويمالارى سۋ جيناۋ رەجيمىندە جۇمىس ىستەيدى. كوكتەمدە ەلىمىزدىڭ سۋ قويمالارى 75 ميلليارد تەكشە مەتر سۋ جيناپ، ەرىگەن سۋدى قاۋىپسىز وتكىزۋدى قامتاماسىز ەتتى. بۇل وتكەن جىلمەن سالىستىرعاندا 15 ميلليارد تەكشە مەترگە ارتىق. بۇل كولەمنىڭ 12 ميلليارد تەكشە مەتردەن استامى تاسقىن سۋ»، - دەدى سۋ رەسۋرستارى جانە يررگاتسيا ۆيتسە- ءمينيسترى نۇرلان الدامجاروۆ.