ەلىمىزدەگى مەمقىزمەتشىلەردىڭ 68 پايىزى - ءۇيلى- باراندى

استانا. قازاقپارات - 23-ماۋسىم - قازاقستاندا مەملەكەتتىك قىزمەتشىلەر كۇنى. وسى ورايدا قوعامدىق ساياسات ينستيتۋتىنىڭ شولۋىن وقىرمان نازارىنا ۇسىنامىز.

بيىل 1-قاڭتارداعى مالىمەتكە سايكەس، ەلىمىزدە 83 مىڭ مەملەكەتتىك قىزمەتشى بار. ولاردىڭ ورتا جاسى - 39-40 ارالىعى، ال جۇمىس ءوتىلى - 10-12 جىل.

مەملەكەتتىك قىزمەتتەگى ايەلدەردىڭ ۇلەسى 55,5 پايىز، ونىڭ ىشىندە 39,2 پايىز باسشىلىق لاۋازىمدا.

الايدا، جاستاردىڭ ۇلەسى ازايعان، ياعني 2018-جىلى 24,6 پايىز بولسا، 2022-جىلى 17,8 پايىزعا دەيىن تومەندەپ وتىر.

سونداي-اق، مەملەكەتتىك قىزمەتكە ىرىكتەۋدىڭ اشىقتىعىن ارتتىرۋ ءۇشىن eqyzmet.gov.kz ينتەرنەت- پورتالى پيلوتتىق رەجيمدە ىسكە قوسىلدى.

جاڭا جوبانىڭ باستى ەرەكشەلىگى - كونكۋرسقا ىرىكتەۋدىڭ بارلىق كەزەڭىندە ونلاين فورماتتا قاتىسۋعا بولادى.

اتالعان جوباعا 2023-جىلعى 1-ناۋرىزدان بەرى 6 مەملەكەتتىك ورگان ەنگىزىلسە، ال بيىل 1-شىلدەدە ولاردىڭ سانى 22 گە جەتپەك.

مەملەكەتتىك قىزمەت ىستەرى اگەنتتىگىنىڭ دەرەكتەرى بويىنشا، وتكەن جىلدىڭ 9 ايىندا 11296 ۇمىتكەر كونكۋرس بويىنشا مەملەكەتتىك قىزمەتكە تاعايىندالدى.

بۇگىندە ۇكىمەت اكىمشىلىك رەفورمانى جالعاستىرىپ جاتىر:

- 496 فۋنكتسيا ورتالىقتاندىرىلماعان،

- مەملەكەتتىك اپپارات جۇمىسىن بيۋروكراتيالاندىرۋ شەڭبەرىندە زاڭداردان 364 فۋنكتسيا الىنىپ تاستالدى.

ەلىمىزدەگى مەملەكەتتىك باسقارۋ جۇيەسىنىڭ باستى جەتىستىكتەرىنىڭ ءبىرى - مەملەكەتتىك قىزمەتتەردى تسيفرلاندىرۋ.

مەملەكەتتىك تىزىلىمگە 1353 قىزمەت كىرەدى، ونىڭ 92 پايىز ەلەكتروندى تۇردە قولجەتىمدى.

وتكەن جىلى 274 ميلليوننان استام مەملەكەتتىك قىزمەت كورسەتىلدى، ونىڭ 93 پايىز ەلەكتروندى تۇردە ۇسىنىلعان.

سونداي-اق، 62 مىڭ ادامنىڭ اراسىندا جۇرگىزىلگەن قوعامدىق مونيتورينگ دەرەكتەرى بويىنشا رەسپوندەنتتەردىڭ 81,3 پايىز مەملەكەتتىك قىزمەت كورسەتۋ ساپاسىنا قاناعاتتانارلىق باعا بەرىپ وتىر.

بۇل - سوڭعى 9 جىلداعى ەڭ جوعارى كورسەتكىش.

وسى ورايدا 87 دەرەكقوردى بىرىكتىرەتىن جانە ونىمەن جۇمىس ىستەۋ ءۇشىن كوپتەگەن قۇرالدى ۇسىناتىن Smart Data Ukimet (SDU) جۇيەسىنە ەرەكشە نازار اۋدارۋعا بولادى.

2023-جىلى SDU جۇيەسى بەدەلدى «Future of Government Awards 2023» ، Open Source Adaption» نوميناتسياسىندا توپ-3 كە كىردى.

ايتا كەتسەك، الەمنىڭ 50 ەلىنەن 300 جوبانىڭ ىشىندە SDU جوباسى ب ۇ ۇ دامۋ باعدارلاماسىمەن (ب ۇ ۇ د ب)، «Public digital» جانە «AWS» ينستيتۋتىمەن ەرەكشەلەندى جانە باسقا ەلدەردە پايدالانۋعا ۇسىنىلدى.

Future of Government Awards سيفرلىق شەشىمدەر مەن تەحنولوگيالار ارقىلى ادام ءومىرىن وزگەرتەتىن ىسكەرلەردى، كوماندالاردى جانە كوشباسشىلاردى اتاپ وتىر.

تاعى ءبىر جوبا - «وتباسىنىڭ سيفرلىق كارتاسى»، ول 1300 ءوتىنىمنىڭ ىشىنەن «ينكليۋزيۆتى سيفرلىق ترانسفورماتسيا» ساناتىندا ۇزدىك دەپ تانىلدى.

وسىلايشا قوعامدىق ساياسات ينستيتۋتى ساۋالناماعا قاتىسقان رەسپوندەنتتەردىڭ نەگىزىندە مەملەكەتتىك قىزمەتشىنىڭ وتباسىلىق پورترەتىن جاسادى.

دەرەكتەرگە سايكەس، مەملەكەتتىك قىزمەتشىلەردىڭ 68 پايىز نەكەدە.

ونىڭ ىشىندە:

42 پايىز - 35 جاسقا دەيىنگى جاستار؛

30,5 پايىز - ورتا جاستاعى ادامدار (36-45 جاس)؛

27,3 پايىز - ەگدە جاستا (46-63 جاس).

وتباسىلى مەملەكەتتىك قىزمەتشىلەردىڭ 64 پايىزدان استامىنىڭ بالاسى بار، ال ونىڭ ىشىندە 14 پايىز - كوپبالالى اتا-انا.