ەلىمىزدەگى ەڭ ۇلكەن ستاديوننىڭ قۇرىلىسى باستالدى

استانا. KAZINFORM - شىمكەنت قالاسىندا ەلىمىزدەگى ەڭ ۇلكەن ستاديوننىڭ قۇرىلىسى باستالدى. بۇگىن سالتاناتتى شاراعا قالا اكىمى عابيت سىزدىقبەكوۆ قاتىسىپ، ىرگەتاسىن قالادى. الاڭ تۇران - 2 شاعىناۋدانىندا بوي كوتەرەدى.

35 مىڭ ادامعا لايىقتالعان جاڭا ارەنانىڭ اۋماعى - 21 گەكتار. زاماناۋي ستاديون قالا تۇرعىندارىنىڭ فۋتبولعا دەگەن قىزىعۋشىلىعىن ارتتىرا وتىرىپ، فۋتبولشىلار مەن جانكۇيەرلەرگە شابىت بەرەرى ءسوزسىز. سونداي-اق الەمدىك دودالار وتكىزۋگە مۇمكىندىك بەرەدى جانە تۋريزمنىڭ دامۋىنا ىقپال ەتەدى.

ستاديون قۇرىلىسىن 2026-جىلدىڭ ورتاسىنا دەيىن اياقتاۋ جوسپارلانعان. بۇل ەلىمىزدەگى ەڭ ۇلكەن ستاديون بولماق.

قازاقستانداعى ەڭ ۇلكەن فۋتبول الاڭدارى:

1. «استانا ارەنا» - 30200

2. الماتى ورتالىق ستاديونى - 23804

3. مۇڭايتپاسوۆ اتىنداعى ستاديون (شىمكەنت) - 20000

4. «شاحتەر» ورتالىق ستاديونى (قاراعاندى) - 19500

5. قوبىلاندى باتىر اتىنداعى ستاديون (اقتوبە) - 13500

ايتا كەتەيىك، قازىرگى تاڭدا شىمكەنتتە تەك قاجىمۇقان مۇڭايتپاسوۆ اتىنداعى «ورتالىق» ستاديون بار. ستاديون 1969-جىلى پايدالانۋعا بەرىلگەن. سىيىمدىلىعى - 18000 ورىن. 2003-جىلدان بەرى «ورداباسى» كلۋبىنىڭ نەگىزگى ارەناسى بولىپ كەلەدى. بۇل الاڭ دا قوسىمشا جوندەۋدەن ءوتىپ، ويىندار مەن جەڭىل اتلەتيكا جارىستارى ۇيىمداستىرىلاتىن ستاديون بولادى.