ەلىمىزدەگى حالىق سانى 1897 -جىلدان بەرى قالاي وزگەردى

استانا. KAZINFORM - قازاقستان اۋماعىنداعى حالىق سانىنىڭ XIX عاسىردىڭ سوڭىنان بەرى قالاي وزگەردى. بۇل تۋرالى مالىمەتتى ۇلتتىق ستاتيستيكا بيۋروسى جاريالادى.

رەسەي يمپەرياسىنىڭ 1897 -جىلعى العاشقى جالپىحالىقتىق ساناعىنىڭ دەرەكتەرىنە سايكەس، كەيىنىرەك قازاق ا س س ر-ىنىڭ قۇرامىنا ەنگەن جەرلەردە 4,3 ميلليون ادام تۇرعان، ولاردىڭ 3,5 ميلليون قازاق بولعان.

حالىق سانىنىڭ جىلدار بويىنشا ديناميكاسى تومەندەگىدەي:

•1913 ج. - 5,5 ميلليون
•1920 ج. - 5,4 ميلليون
•1922 ج. - 5,3 ميلليون
•1939 ج. - 6 ميلليون
•1959 ج. - 9,2 ميلليون
•1970 ج. - 13 ميلليون
•1979 ج. - 14,6 ميلليون
•1984 ج. - 15,6 ميلليون

- تاۋەلسىزدىك العاننان كەيىن، 1991 -جىلى قازاقستان حالقىنىڭ سانى 16,4 ميلليون ادام بولدى. الايدا كوشى-قون ۇدەرىستەرىنە بايلانىستى 2000 -جىلى بۇل كورسەتكىش 14,9 ميلليون دەيىن ازايدى. 2010 -جىلى حالىق سانى قايتادان 16 ميلليون مەجەسىنەن اسىپ، 16,2 ميلليون ادام بولدى.

2023 -جىلعى قاراشادا ەلىمىزدەگى حالىق سانى العاش رەت 20 ميلليوننان استى. ال 2025 -جىلعى 1-ماۋسىمداعى سوڭعى دەرەكتەرگە سايكەس، قازاقستان حالقىنىڭ سانى - 20,3 ميلليون ادام، - دەلىنگەن حابارلامادا.

ەلىمىزدىڭ جەتى وڭىرىندە حالىق سانى 1 ميلليون ادامنان اساتىنى تۋرالى جازعان ەدىك.