ەلىمىزدىڭ بىرنەشە وبلىسىندا توتەنشە اۋا رايى قۇبىلىستارى بولجانۋدا

استانا. قازاقپارات - 1-تامىزدا قازاقستاننىڭ كوپتەگەن وبلىستارىندا قولايسىز مەتەورولوگيالىق جاعداي قالىپتاسادى، دەپ حابارلايدى «قازگيدرومەت» ر م ك.

سيكلون جانە سوعان بايلانىستى اتموسفەرالىق فرونتتاردىڭ وتۋىنە بايلانىستى ەلىمىزدىڭ باسىم بولىگىندە جاڭبىر جاۋادى، نايزاعاي ويناپ، بۇرشاق پەن داۋىل كۇتىلەدى.

سولتۇستىك، سولتۇستىك- باتىس، ورتالىق، وڭتۇستىك جانە وڭتۇستىك- شىعىس وڭىرلەردە قاتتى جاڭبىر بولجانىپ وتىر. رەسپۋبليكا بويىنشا جەل كۇشەيىپ، كۇندىز ەلىمىزدىڭ وڭتۇستىگى مەن وڭتۇستىك- باتىسىندا شاڭدى داۋىل سوعۋى مۇمكىن.

سولتۇستىك ايماقتاردا تۇنگى جانە تاڭەرتەڭگى ۋاقىتتاردا تۇمان كۇتىلەدى.

كۇندىز الماتى وبلىسىندا - 35 گرادۋس، اتىراۋ وبلىسى مەن باتىس قازاقستان وبلىسىنىڭ وڭتۇستىگى مەن باتىسىندا 35-36 گرادۋس، ال ماڭعىستاۋ وبلىسىندا 38 گرادۋسقا دەيىن اپتاپ ىستىق بولادى دەپ بولجانۋدا.

اباي وبلىسىندا، شىعىس قازاقستان وبلىسىنىڭ شىعىسىندا، پاۆلودار وبلىسىنىڭ باتىسى مەن سولتۇستىگىندە، باتىس قازاقستان وبلىسىنىڭ باتىسى مەن وڭتۇستىگىندە، قاراعاندى وبلىسىنىڭ سولتۇستىگىندە جانە ماڭعىستاۋ وبلىسىنىڭ وڭتۇستىك- شىعىسىندا جوعارى ءورت قاۋپى ساقتالادى.

قىزىلوردا، تۇركىستان، الماتى، جەتىسۋ وبلىستارى مەن جامبىل وبلىسىنىڭ سولتۇستىك، باتىس جانە شىعىس بولىكتەرىندە، قاراعاندى وبلىسىنىڭ باتىسى مەن وڭتۇستىگىندە، سونداي-اق اقتوبە، قوستاناي، ۇلىتاۋ، اتىراۋ، ماڭعىستاۋ، اباي جانە شىعىس قازاقستان وبلىستارىنىڭ ءبىرقاتار وڭىرلەرىندە توتەنشە ءورت قاۋپى بولجانىپ وتىر.