ەلىمىزدەگى اۆتومەكتەپتەردە وقۋ باعاسى قانشا

استانا. KAZINFORM - اۆتومەكتەپتەر وقۋ پروتسەسى كەزىندە جول ەرەجەسىن تەوريا جۇزىندە ۇيرەنىپ قانا، كولىك ايداۋدى ۇيرەتەدى، دەپ حابارلايدى Kazinform اگەنتتىگى.

باعانى دۇرىس سالىستىرۋ ءۇشىن ءبىز سالماعى 3,5 توننا بولاتىن جەڭىل كولىكتى جۇرگىزۋگە ارنالعان «B» ساناتتى كۋالىگىنىڭ وقۋ اقىسىن بىلدىك. قالالاردا وقۋ مەرزىمى - 2-3 اي. ءبىر ايدان سوڭ ءبىلىم الۋشىلار قالا ىشىندە نەمەسە اۆتودرومدا نۇسقاۋشى كومەگىمەن كولىك جۇرگىزە الادى. وقۋ اقىسىن سالىستىرۋ كەزىندە كۋرس جانە نۇسقاۋشىمەن 18 ساعات كولىك جۇرگىزۋ نەگىزگە الىندى.

ەڭ قىمبات كۋرس الماتى قالاسىندا بولىپ شىقتى. مۇندا جەڭىل كولىك جۇرگىزۋ كۋرسى 70000 تەڭگەدەن باستالىپ، 150000 تەڭگەگە جەتەدى. مۇندا كۋرس قۇنى ورتا ەسەپپەن 110000 تەڭگە. ال نۇسقاۋشىمەن ءبىر ساعات كولىك جۇرگىزۋ قۇنى - 10000 تەڭگە. ەگەر 18 ساعاتتىڭ شىعىنىن قوسساق، 180000 تەڭگە بولادى. كۋرس پەن كولىك جۇرگىزۋدى قاتار ۇيرەنۋ - 290000 تەڭگە.

اقتاۋدا باعا بۇدان 38000 تەڭگەگە ارزان. ءبىراق «B» ساناتتى كۋالىگىن الۋعا ارنالعان كۋرستىڭ تولىق قۇنى سوندا دا 252000 تەڭگەگە شىعىپ تۇر. ونىڭ 90 مىڭ تەڭگەسى وقۋ اقىسى، ال 162000 تەڭگە (نۇسقاۋشىمەن بىرگە 1 ساعات كولىك ايداۋ قۇنى 9000 تەڭگە) كولىك جۇرگىزۋگە كەتەدى.

استانا قالاسىندا دا تاڭداۋ كوپ. كەيبىر اۆتومەكتەپتەردە كۋرس قۇنى 60000 تەڭگە، ال كەيبىرىندە 120000 تەڭگە بولىپ تۇر. اۆتومەكتەپتەردە كولىك جۇرگىزۋدى ۇيرەنۋ قۇنى 6000 تەڭگەدەن باستالىپ، 10000 تەڭگەگە دەيىن جەتەدى. قالادا وقۋ كۋرسى ورتا ەسەپپەن 80000 تەڭگە. سونىمەن بىرگە نۇسقاۋشىمەن كولىك جۇرگىزۋ ءۇشىن ءار ساعاتى 8000 تەڭگە. بۇل دەگەنىمىز - 18 ساعاتتىق وقۋعا 144000 تەڭگە كەرەك. كۋرستان تولىق ءوتۋ قۇنى - 224000 تەڭگە.

قونايەۆ قالاسىندا باعا ءسال تومەن. كۋرستىڭ جالپى قۇنى 215000 تەڭگە. ونىڭ 80000 تەڭگەسى وقۋعا، 135000 تەڭگەسى كولىك جۇرگىزۋگە (ساعاتىنا 7500 تەڭگە) جۇمسالادى. اتىراۋدا باعا ەداۋىر تومەن. مۇندا كۋرستىڭ جالپى قۇنى - 199000 تەڭگە. ونىڭ 55000 تەڭگەسى كۋرسقا جۇمسالادى. ال نۇسقاۋشىمەن بىرگە كولىك جۇرگىزۋ ءۇشىن ءار ساعاتىنا 8000 تەڭگە تولەۋگە تۋرا كەلەدى.

تالدىقورعان مەن شىمكەنتتە كۋرس قۇنى 60000 تەڭگە بولىپ تۇر. ءبىراق تالدىقورعاندا كولىك جۇرگىزۋدى ۇيرەنۋ ءۇشىن 126000 تەڭگە (ساعاتىنا 7000 تەڭگە) تولەۋگە تۋرا كەلەدى. ال شىمكەنتتە ونىڭ قۇنى 108000 تەڭگە (ساعاتىنا 6000 تەڭگە) دەپ ەسەپتەلگەن. ورالدا 2,5-ايلىق كۋرستى وقۋ ءۇشىن 70000 تەڭگە جانە كولىك جۇرگىزىپ ۇيرەنۋ ءۇشىن ساعاتىنا 6000 تەڭگە تولەيدى.

كوكشەتاۋدا اۆتومەكتەپتە وقۋ باعاسى جوعارى. مۇندا 75000 تەڭگە، ءبىراق پراكتيكالىق وقۋ باعاسى تومەن. ساعاتىنا 5000 تەڭگە بولسا، تولىق كۋرسقا 165000 تەڭگە تولەيدى.

قىزىلوردا مەن تارازدا كۋرس باعاسى - 50000 تەڭگە. ال نۇسقاۋشىمەن بىرگە كولىك جۇرگىزىپ ۇيرەنۋگە 5000 تەڭگە تولەيدى. تولىق كۋرس - 140000 تەڭگە.

جەزقازعان مەن قاراعاندىدا تەوريالىق ءبىلىم الۋ، جول ەرەجەسىن ۇيرەنۋ 40000 جانە 35000 تەڭگە. ال كولىك رۋلىنە وتىرىپ، جۇرگىزىپ ۇيرەنۋ ساعاتىنا 5500 تەڭگە (18 ساعاتتىق وقۋ قۇنى - 99000 تەڭگە) بولىپ تۇر.

وسكەمەن (137000 تەڭگە) مەن قوستانايدا (126000 تەڭگە) باعا شامالاس. مۇندا وقۋ اقىسى ورتا ەسەپپەن 45-47,5 مىڭ تەڭگە. ال قوستانايدا كولىك جۇرگىزۋدى ۇيرەنۋ 500 تەڭگەگە (بىرىندە 4500، ەكىنشىسىندە 5000 تەڭگە) ارزان.

پەتروپاۆل مەن تۇركىستاندا باعا ورتاشادان تومەن. ەگەر وڭتۇستىكتە 50000 تەڭگە بولسا، سولتۇستىكتە 60000 تەڭگە. ال كولىك جۇرگىزۋدى ۇيرەنۋ ءۇشىن قالالىقتار ساعاتىنا 4000 تەڭگە (18 ساعاتقا 72000 تەڭگە) تولەيدى.

تولىق كۋرس باعاسى ارزان ۇشتىككە پاۆلودار قالاسى كىرىپ تۇر. مۇندا نۇسقاۋشىمەن بىرگە كولىك جۇرگىزۋ ءۇشىن ساعاتىنا 2500 تەڭگە تولەيدى. تەك تەوريالىق كۋرس قۇنى استاناداعى باعامەن بىردەي، ياعني، 80000 تەڭگە. دەگەنمەن كۋرس قۇنى ورتا ەسەپپەن 125000 تەڭگەگە شىعادى.

اقتوبەدە تەوريا مەن پراكتيكا قۇنى شامالاس. ءبىرى 60، ەكىنشىسى 63 مىڭ تەڭگە (مۇندا كولىك جۇرگىزۋ 3500 تەڭگە) تۇرادى.

ەلىمىزدە سەمەي قالاسىندا عانا ەڭ تومەن باعا ۇسىنىلادى. مۇندا كۋرستىڭ تەوريالىق بولىگى 40000 تەڭگە، ال كولىك جۇرگىزۋ ءۇشىن ساعاتىنا 4000 تەڭگە (بارلىعى 72000 تەڭگە) تولەيدى. سوندا تولىق كۋرس قۇنى - 112000 تەڭگە.

بۇعان دەيىن قازاقستاندا جىلجىمايتىن مۇلىكتى ساقتاندىرۋ قۇنى قانشا تۇراتىنىن بىلدىك.

اۆتور

التىناي ساعىندىقوۆا