ەلىمىزدىڭ اسا ماڭىزدى نىساندارىنا جاسالعان 163,4 ميلليون كيبەرشابۋىلعا تويتارىس بەرىلگەن
پرەزيدەنت «مەملەكەتتىك تەحنيكالىق قىزمەت» اكسيونەرلىك قوعامىنا باردى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.

مەكەمە قىزمەتىمەن تانىسۋ بارىسىندا مەملەكەت باسشىسىنا قازاقستان رەسپۋبليكاسىنىڭ اقپاراتتىق قاۋىپسىزدىگىن قامتاماسىز ەتۋ ءىسىنىڭ قازىرگى جاي- كۇيى جانە قابىلدانىپ جاتقان شارالار جونىندە مالىمەت بەرىلدى.
پرەزيدەنتكە اقپاراتتىق قاۋىپسىزدىكتىڭ ۇلتتىق ۇيلەستىرۋ ورتالىعىنىڭ، تەلەكوممۋنيكاتسيا جەلىلەرىن باسقارۋ ورتالىعىنىڭ، سونداي- اق كومپيۋتەرلىك ينتسيدەنتتەرگە قارسى ۇلتتىق ارەكەت ەتۋ قىزمەتىنىڭ جانە زياندى كودتى زەرتتەۋ ورتالىعىنىڭ جۇمىس پروتسەسى مەن ناتيجەلەرى تانىستىرىلدى.
پرەزيدەنتكە بيىل 9 اي ىشىندە مەملەكەتتىك ورگانداردىڭ رەسۋرستارى مەن ەلىمىزدىڭ اسا ماڭىزدى نىساندارىنا جاسالعان 163,4 ميلليون كيبەرشابۋىلعا تويتارىس بەرىلگەنى جونىندە باياندالدى.
قاسىم- جومارت توقايەۆ ەلىمىزدىڭ اقپاراتتىق ينفراقۇرىلىمىنىڭ تۇراقتى قىزمەتىن قامتاماسىز ەتەتىن جانە وسى سالاداعى قاۋىپسىزدىككە تونگەن كەز كەلگەن قاتەرگە توتەپ بەرەتىن مەحانيزمدەردى دامىتۋ ماڭىزدى ەكەنىن اتاپ ءوتتى.
مەملەكەت باسشىسى اتالعان قىزمەتتى جەتىلدىرۋ ماسەلەلەرىنە قاتىستى ءبىرقاتار ناقتى تاپسىرما بەردى.
اۆتور
ايدار وسپاناليەۆ