ەلىمىزدە زاڭ مەن ءتارتىپ مىزعىماس قاعيداتقا اينالۋعا ءتيىس - پرەزيدەنت

استانا. KAZINFORM - پرەزيدەنت ءىس-شاراعا جينالعان قاۋىم الدىندا ءسوز سويلەپ، ەلىمىزدەگى ديپلوماتيا سالاسىنىڭ قىزمەتكەرلەرى مەن ارداگەرلەرىن كاسىبي مەرەكەلەرىمەن قۇتتىقتادى. بۇل تۋرالى اقوردانىڭ باسپا ءسوز قىزمەتى حابارلادى.

- بابالارىمىز عاسىرلار بويى «دالا ديپلوماتياسىمەن» ءومىر سۇرگەن. حالقىمىزدىڭ مامىلەگەرلىك ءداستۇرىنىڭ ارقاسىندا ۇلى دالادا بەيبىت ءومىردىڭ ەرەكشە ۇلگىسى قالىپتاسقان. قۇرمەت پەن سىيلاستىق قاشاندا قاستەرلى قۇندىلىق رەتىندە باعالانعان. ەرتەدەن كەلە جاتقان وسى قاعيدا - سىرتقى ساياساتىمىزدىڭ مىزعىماس تىرەگى ءارى اينىماس تەمىرقازىعى، - دەدى مەملەكەت باسشىسى.

پرەزيدەنت استانادا ازياداعى ءوزارا ءىس-قيمىل جانە سەنىم شارالارى جونىندەگى كەڭەس شتاب-پاتەرىنىڭ اشىلۋىن شىن مانىندە ەلەۋلى تاريحي ۋاقيعا رەتىندە اتاپ ءوتتى.

- وتىز جىلدان استام ۋاقىت بۇرىن قازاقستان ازياداعى ءوزارا ءىس-قيمىل جانە سەنىم شارالارى جونىندەگى كەڭەستى قۇرۋ باستاماسىن كوتەردى. بۇل حالىقارالىق قوعامداستىق تاراپىنان تۇراقتىلىق پەن قاۋىپسىزدىكتى نىعايتۋ جولىندا ءوڭىر ەلدەرىنىڭ كۇش-جىگەرىن بىرىكتىرۋ ءۇشىن دەر كەزىندە جاسالعان قادام رەتىندە كەڭ قولداۋعا يە بولدى. ءبىز اۋەل باستا تەك ىنتىماقتاستىق، ءوزارا تۇسىنىستىك پەن ديالوگ ارقىلى عانا بەيبىتشىلىك پەن تۇراقتىلىقتى ساقتاپ، ءوسىپ- وركەندەي الاتىنىمىزعا سەندىك. ۇيىمنىڭ سەنىم شارالارىن نىعايتۋ قاعيداتى قازىرگى زاماندا اسا وزەكتى. ازيانىڭ 90 پايىزىن قامتيتىن جانە الەم حالقىنىڭ جارتىسىنان استامىن بىرىكتىرەتىن اوسشك حالىقارالىق قاتىناستاردىڭ دامىپ كەلە جاتقان ارحيتەكتۋراسىنداعى ماڭىزدى ەلەمەنتكە اينالدى، - دەدى قاسىم-جومارت توقايەۆ.

پرەزيدەنت گەوساياسي شيەلەنىستىڭ ءورشۋى مەن كوپجاقتىلىق قاعيداتتارىنىڭ السىرەۋى وڭىرلىك جانە جاھاندىق تۇراقتىلىققا ەداۋىر قاۋىپ توندىرەتىنىنە نازار اۋداردى.

- الەم بۇرىن-سوڭدى بولماعان كۇردەلى ۇدەرىستەرمەن بەتپە-بەت كەلىپ وتىر. ونى بايىپپەن زەردەلەپ، تەرەڭ ءتۇسىنۋ قاجەت. شىن مانىندە، حالىقارالىق قۇقىقتىڭ نەگىزدەرى بىرتىندەپ كۇيرەپ، وزدەرىن زاڭ تالاپتارىنان جوعارى قوياتىن كۇشتەر پايدا بولا باستادى. مۇنداي جاعدايدا بارلىق ەلدىڭ حالىقارالىق قۇقىق پەن بۇۇ جارعىسى قاعيداتتارىن قاتاڭ ساقتاپ، ورتاق نورمالاردى ءبىرجاقتى تاپسىرلەمەۋى ماڭىزدى، - دەدى مەملەكەت باسشىسى.

قاسىم-جومارت توقايەۆتىڭ ايتۋىنشا، قازاقستان اۋقىمدى ساياسي جانە ەكونوميكالىق رەفورمالاردى جۇيەلى تۇردە جۇزەگە اسىرۋعا نيەتتى.

- مەنىڭ پرەزيدەنت رەتىندەگى ۇستانىمىم - ەلىمىزدە زاڭ مەن ءتارتىپ مىزعىماس قاعيداتقا اينالۋعا ءتيىس. جۇرگىزىلگەن رەفورمالار ناتيجەسىندە بەيبىت جينالىستار تۋرالى زاڭ جەتىلدىرىلىپ، ساياسي پارتيالاردى تىركەۋ شەگى تومەندەتىلدى. جالا جابۋدى قىلمىس ساناتىنان شىعارىپ، ءولىم جازاسىن الىپ تاستادىق. اتالعان شارالار ەلىمىزدىڭ دەموكراتيا قۇندىلىقتارىنا، زاڭ ۇستەمدىگىنە ءاردايىم بەيىل ەكەنىن كورسەتەدى، - دەدى قاسىم-جومارت توقايەۆ.

ايتا كەتەلىك پرەزيدەنت ەلوردادا ازياداعى ءوزارا ءىس-قيمىل جانە سەنىم شارالارى كەڭەسى (ا و س ش ك) شتاب-پاتەرىنىڭ اشىلۋ راسىمىنە قاتىستى.