ەلىمىزدە ۋتيليزاتسيالىق الىم جويىلمايدى - مينيستر

استانا. قازاقپارات - ونەركاسىپ جانە قۇرىلىس ءمينيسترى قانات شارلاپايەۆ قازاقستاندا ۋتيليزاتسيالىق الىم الىنبايتىنىن ايتتى.

سەناتتاعى پارلامەنتتىك تىڭداۋدان سوڭ مينيسترگە «از عانا توپ ۋتيليزاتسيالىق الىمدى الىپ تاستاۋ تۋرالى تالاپ قويدى. ولاردىڭ تالابى ەسكەرىلمەۋى دۇرىس دەپ ويلايسىز با؟» دەگەن سۇراق قويىلدى.

قانات شارلاپايەۆ ۋتيلالىمعا قارسى توپپەن كەزدەسكەنىن، ماسەلە زاڭدى تۇردە شەشىلۋ كەرەكتىگىن جەتكىزدى.

«ولاردىڭ تالابىن ەسكەرۋ ءۇشىن زاڭ بويىنشا پروتسەسس بولۋى كەرەك. ۋتيليزاتسيالىق الىمعا قارسى توپتاردىڭ وكىلدەرى استاناعا كەلىپ، مەنىمەن تىكەلەي سويلەستى. قازىر ۇكىمەتتە ۋتيلالىمدى وزگەرتۋ بويىنشا ەشقانداي جوسپار جوق. بىرىنشىدەن، ارينە، حالىقتىڭ پىكىرى ەسكەرىلۋى كەرەك. ءبىراق ونى زاڭ بويىنشا ىسكە اسىرۋىمىز شارت.

ەكىنشىدەن، بۇگىندە ۋتيلالىمعا قارسى پەتيتسياعا قول قويىلىپ جاتىر. پەتيتسيا اياقتالعاننان كەيىن ونى ۇكىمەت دەڭگەيىندە قاراستىرامىز. زاڭ بويىنشا پروتسەدۋرا وسىنداي»، - دەدى ۆەدومستۆو باسشىسى.

مينيستر ەلىمىزدە ۋتيليزاتسيالىق الىم جويىلمايتىنىن اتاپ ءوتتى.

«مەنىڭ ويىمشا، پەتيتسيانىڭ قورىتىندىسى ۇكىمەت دەڭگەيىندە قارالادى. بارىنە تۇسىنىكتى بولۋ ءۇشىن تاعى قايتالاپ ايتامىن، ءبىز ۋتيليزاتسيالىق الىمدى الىپ تاستاۋدى قاراستىرىپ جاتقان جوقپىز»، - دەدى قانات شارلاپايەۆ.

 Massaget.kz