ەلىمىزدە تەرى وڭدەۋ سالاسى قايتا جاندانادى
استانا. KAZINFORM - ەلدە تەرى يلەيتىن 9 زاۋىت بار. سونىڭ ءبىرى سەمەي قالاسىندا. كاسىپورىن جىلىنا مىڭ توننا تەرى وڭدەيدى، دەپ حابارلايدى 24kz.
«مەملەكەتتەن قولداۋ بولسا، ءوندىرىس قارقىنىن ودان ءارى كۇشەيتەر ەدىك» - دەيدى ماماندار. جالپى ەلدە جىلىنا ءىرى قارا مالدان 3,5 ميلليون تەرى الىنادى. ءبىراق ونىڭ %17- ءى عانا وڭدەلەدى ەكەن. تاقاۋدا مەملەكەت باسشىسى موڭعولياعا بارىپ، ءبىرقاتار كەلىسىم جاسادى. سونىڭ ءبىرى ەندى تاراپتار تەرى وڭدەۋ سالاسىن بىرلەسىپ جانداندىرادى. سەمەيدەگى تەرى وڭدەۋ زاۋىتى ايىنا 700-800 توننا تەرى وڭدەپ، 30 مىڭ توننا ءونىم الادى. ءبىراق تەرىنى وڭتۇستىك وبلىستاردان اكەلەدى. ويتكەنى وڭىردە ءتورت-تۇلىك تالاپقا ساي سويىلمايدى ەكەن.
«ياعني، مال تەرىسى وڭدەۋگە جارامسىز»، - دەيدى.
نۇرمان نۇپتەكەيەۆ، سەمەي تەرى وڭدەۋ زاۋىتى ديرەكتورىنىڭ ورىنباسارى:
- تەرىنى كەسىپ سويعاندا پىشاقتىڭ ءىزىن قالدىرىپ، قالاي بولسا سولاي جاڭاعى تاۋار ەمەس قوقىس رەتىندە قارايتىن قالىپتاسقان بىزدە. ەندى ولاردى دا كىنالاي المايسىڭ. «باعاسى جاقسى بولسا، جاقسىلاپ سويار ەدىك»، - دەيدى. ودان كەيىن ونى ساقتاۋ كەرەك. ونى تۇزداماسا، ول ساقتالمايدى. وسىنداي قاتەلىكتەر جىبەرىلىپ جاتىر.
پەتر لازاريەۆ 20 جىلدان استام ۋاقىت مال شارۋاشىلىعىمەن اينالىسادى. بۇگىندە 1300 دەن استام سيىر ۇستايدى. «سويىلعان مالدىڭ تەرىسىن قوقىسقا شىعارامىز»، - دەيدى. اينالا ولەكسە ساسىماس ءۇشىن تەرى توگىلگەن جەردى ورتەپ تۇرۋعا تۋرا كەلەدى. مال تەرىسى بۇرىن شارۋالار ءۇشىن تابىس كوزى بولسا، قازىر قوسىمشا جۇك بولىپ تۇر.
اۋىل شارۋاشىلىعى باسقارماسىنىڭ مالىمەتىنشە، سەمەيدەگى شاقامان اۋىلىنىڭ ماڭىندا ەت كومبيناتىنىڭ قۇرىلىسى باستالعان. كاسىپورىن 2026 -جىلعا دەيىن قولدانىسقا بەرىلەدى. تەرى وڭدەيتىن زاۋىت ىستەپ كەتسە، ەت كومبيناتى وعان تەرى جەتكىزىپ وتىرسا، بۇل ۇلكەن جوبا تالاي پروبلەمالاردى شەشۋشى ەدى. سەمەيدەگى تەرى وڭدەۋ زاۋىتى مامىر ايىندا ىسكە قوسىلدى. وعان دەيىن 1 جىلعا جۋىق بوس تۇرعان ەدى. كاسىپورىن يەلەرىنىڭ ايتۋىنشا، مەملەكەت تاراپىنان قولداۋ بولسا، زاۋىت ايىنا 50 مىڭ تونناعا دەيىن تەرى وڭدەي الادى.
24.kz
