ەلىمىزدە ەت باعاسى تۇسە مە

ۇلتتىق ەكونوميكا ءمينيسترى الىبەك قۋانتىروۆ قازاقستانداعى ەت باعاسىنا قاتىستى پىكىر ايتتى، دەپ حابارلايدى Kazinform.

ايتا كەتەيىك، جاقىندا اۋىل شارۋاشىلىعى ءمينيسترى ايداربەك ساپاروۆ ەت باعاسى تومەندەپ جاتقانىن ءمالىم ەتكەن ەدى.

«اۋىل شارۋاشىلىعى ءمينيسترى ايتقان دەرەكتەر دۇرىس، ويتكەنى بىزدە جارمەڭكەدەن كەلەتىن ونىمدەر بار، ولاردىڭ باعاسى تومەن. ياعني ءتۇرلى ايماقتاردا وتكىزىلەتىن جارمەڭكەلەرگە تىكەلەي جەتكىزەدى. اتاپ ايتقاندا، سيىر ەتىنىڭ باعاسى 2500، 3500 جانە 4500 تەڭگەگە دەيىن، جىلقى ەتىنىڭ باعاسى دا وسىلاي ءارتۇرلى. جالپى، باعا نەگىزىنەن ءارتۇرلى دەڭگەيدە»، - دەدى ءا. قۋانتىروۆ ماجىلىستە تىلشىلەر سۇراعىنا جاۋاپ بەرە وتىرىپ.

مينيستر سۋپەرماركەتتەر مەن بازارلارداعى ونىمدەردىڭ باعاسى دا ءارتۇرلى ەكەنىن ايتتى. وسى ورايدا تىلشىلەر مينيستردەن «ەت باعاسى تومەندەي مە؟» دەپ سۇرادى.

«جالپى، تومەندەۋى مۇمكىن. مال باسى كوبەيسە، ۇسىنىس ارتىپ، ەت ارزاندايدى. ءبىراق ينفلياتسيا مەن جەم-ءشوپ باعاسىنىڭ كوتەرىلۋىنە بايلانىستى ماسەلەلەر بار ەكەنىن ەسكەرۋ كەرەك»، - دەپ ءتۇسىندىردى الىبەك قۋانتىروۆ.