ەلىمىزدە سۋدى تاسىپ ءىشىپ وتىرعان قانشا اۋىل بار

استانا. KAZINFORM - ونەركاسىپ جانە قۇرىلىس ۆيتسە-ءمينيسترى قۋاندىق قاجكەنوۆتەن اۋىزسۋدى تاسىپ ءىشىپ وتىرعان اۋىل تۇرعىندارىنىڭ جاعدايىن سۇراعان ەدىك.

- قازىر ەلىمىزدەگى 6148 اۋىلدىڭ ىشىندە 5679 ەلدى مەكەن سۋمەن جابدىقتالدى. ونىڭ ىشىندە 4420 اۋىل ورتالىقتاندىرىلعان اۋىزسۋ جۇيەسىنە قوسىلعان، سونىمەن قاتار جەرگىلىكتى بيۋجەت ەسەبىنەن 999 كەشەندى مودۋل قويىلدى. سونداي-اق 260 اۋىلدا قۇدىق جانە سۋ ۇڭعىمالارى ورناتىلعان، - دەپ جاۋاپ بەردى قۋاندىق قاجكەنوۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا.

ونەركاسىپ جانە قۇرىلىس مينيسترلىگىنىڭ مالىمەتىنە سۇيەنسەك، بۇگىندە رەسپۋبليكالىق مەنشىكتە جالپى سانى 32 توپتىق سۋ قۇبىرى بار. ولار 1 ميلليون 393 مىڭ حالقى بار 581 ەلدى مەكەندى اۋىزسۋمەن قامتىپ وتىر.

سونىمەن قاتار، قازىر اتالعان ۆەدومستۆو سۋ ينفراقۇرىلىمىن جاقسارتۋ ماقساتىندا 10 وڭىردە توپتىق سۋ قۇبىرى نىساندارىن سالۋ جانە قايتا جاڭارتۋ بويىنشا 31 جوبانى ىسكە اسىرىپ جاتىر. ولاردىڭ قاتارىندا اقمولا، اتىراۋ، الماتى، ۇلىتاۋ، قاراعاندى، قىزىلوردا، ماڭعىستاۋ، تۇركىستان، باتىس قازاقستان جانە سولتۇستىك قازاقستان وبلىسى بار.

ايتا كەتسەك، بيىل 53 ەلدى مەكەنگە ورتالىقتاندىرىلعان اۋىزسۋ جۇيەسى العاش رەت قوسىلادى.

بۇعان دەيىن حابارلاعانىمىزداي، ەلىمىزدە ۇلتتىق سۋ رەسۋرستارى اقپاراتتىق جۇيەسى ازىرلەنىپ جاتىر.