ەلىمىزدە ساربازدارعا كرەديت بەرۋگە تىيىم سالۋ مەحانيزمى ازىرلەندى
استانا. KAZINFORM - ەلىمىزدە مەرزىمدى اسكەري قىزمەتكە شاقىرىلعان ازاماتتار، ولاردىڭ بانك الدىنداعى قارىزى، ميكروكرەديتىنىڭ بار-جوعى نەمەسە كرەديتتىك تولەمدى كەيىنگە قالدىرۋ تۋرالى مالىمەت الماسۋ قاعيدالارىنا وزگەرىستەر ەنگىزىلدى.
قارجى نارىعىن رەتتەۋ جانە دامىتۋ اگەنتتىگىنىڭ قاۋلىسىنا سايكەس، اتالعان جوبا 2025-جىلعى 30-ماۋسىمداعى «قارجى نارىعىن دامىتۋ، قارجىلىق قىزمەتتەر تۇتىنۋشىلارىنىڭ قۇقىعىن قورعاۋ، بايلانىس سالاسى جانە ارتىق زاڭنامالىق رەتتەۋدى جويۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭ اياسىندا دايىندالدى. اتالعان زاڭدا مەرزىمدى اسكەري قىزمەت وتەۋ كەزىندە اسكەري قىزمەتشىلەرگە بانكتەن كرەديت جانە ميكروكرەديت بەرۋگە تىيىم سالۋ قاراستىرىلعان.
اتاپ ايتقاندا، قورعانىس مينيسترلىگى مەن كرەديتتىك بيۋرو اراسىنداعى مەرزىمدى اسكەري قىزمەتشىلەر تۋرالى مالىمەتپەن الماسۋ ءتارتىبى رەگلامەنتتەلەدى. ول مالىمەت جەكە تۇلعانىڭ كرەديتتىك ەسەبىنە ەنگىزىلەدى.
سونداي-اق، جوبادا كرەديتتىك ەسەپتە اسكەري قىزمەت وتەپ جاتقاندىعى تۋرالى اقپارات بولعان جاعدايدا، بانك پەن ميكروقارجى ۇيىمدارىنىڭ ازاماتقا نەسيە بەرۋدەن باس تارتۋ مىندەتى قاراستىرىلعان.
مەملەكەتتىك ورگاندار مەن كرەديتتىك بيۋرو اراسىنداعى ءوزارا ارەكەتتەسۋ ءتارتىبى تولىقتىرىلدى. ەندى بانك قارىز شارتتارى نەمەسە ميكروكرەديت بەرۋ شارتى بويىنشا تولەمدى كەيىنگە قالدىرۋدى توقتاتۋ جانە سىياقى ەسەپتەۋدى قايتا باستاۋ بارىسىندا اسكەري قىزمەتكە شاقىرىلعاندار تۋرالى مالىمەتتى كرەديتوردىڭ الۋ ءتارتىبى ەنگىزىلدى.
كرەديتور بانك قارىز نەمەسە ميكروكرەديت بەرمەس بۇرىن اسكەرگە شاقىرىلاتىن جاستاعى ازاماتتىڭ كرەديتتىك مارتەبەسىن تەكسەرەدى. ەگەر ول مەرزىمدى اسكەري قىزمەتشىنىڭ مارتەبەسىنە يە بولسا، نەسيە بەرىلمەيدى.
ال مەرزىمدى اسكەري قىزمەتتەن بوساتىلعان جاعدايدا (ونىڭ ىشىندە قىزمەت مەرزىمى اياقتالماي تۇرىپ بوساتىلسا) كرەديتتىك بيۋرو ازاماتتىڭ مارتەبەسىن كرەديتتىك ەسەپتەن الىپ تاستايدى.
قۇجات «اشىق نقا» پورتالىندا 17-شىلدەگە دەيىن كوپشىلىك تالقىلاۋىنا ۇسىنىلىپ وتىر.
ايتا كەتەيىك، ەلىمىزدىڭ قورعانىس مينيسترلىگى اسكەردە جۇرگەن ساربازدىڭ نەسيەسىن توقتاتۋ ءۇشىن اتا-انا نە ىستەۋ كەرەكتىگىن ءتۇسىندىردى.
