ەلىمىزدە ساقالدى سپورتشىلاردىڭ ءتىزىمى جاسالدى

استانا. KAZINFORM - تۋريزم جانە سپورت ۆيتسە-ءمينيسترى سەرىك جاراسبايەۆ ءماجىلىس قاراۋىندا جاتقان سپورت تۋرالى زاڭ جوباسىنا تەرروريزم مەن ەكسترەميزمگە قارسى نورمالار ەنگىزىلگەنىن ايتتى.

بۇل ماسەلە ماجىلىستە سپورت تاقىرىبى تالقىلانعان كەزدە كوتەرىلدى. دەپۋتات جيگۋلي دايرابايەۆ ساقالى تىم ۇزىن سپورت ساڭلاقتارىن سىنعا العان بولاتىن. دىنگە قاتتى بەرىلسە، سپورتىن قويىپ، «مەشىتكە بارىپ ناماز وقۋعا» كەڭەس بەرگەن ەدى.

ءوز كەزەگىندە ۆيتسە-مينيستر بۇل ماسەلەنىڭ راسىمەن دە وزەكتى ەكەنىن ايتىپ، ساقالدى سپورتشىلاردىڭ ءتىزىمى بارىن حابارلادى.

«وكىنىشكە قاراي، قازىرگى تاڭدا كوپتەگەن سپورت تۇرلەرىندە، ءوزىڭىز ايتىپ وتىرعانداي، ءدىننىڭ قاتە اعىمىنا كەتىپ قالعان سپورتشىلارىمىز بار. ونى بىلەمىز، ءتىزىمى بار. سپورت تۋرالى زاڭ جوباسىنا تەرروريزم مەن ەكسترەميزمگە قارسى نورمالاردى ەنگىزىپ وتىرمىز. ونى دەپۋتاتتار قولدادى»، - دەدى سەرىك جاراسبايەۆ.