ەلىمىزدە ەر بالالارعا ادام پاپيللوما ۆيرۋسىنا قارسى ۆاكسينا ەگىلۋى مۇمكىن

استانا. KAZINFORM - بۇگىندە جاتىر موينى وبىرىنىڭ نەگىزگى قوزدىرعىشى، ياعني ادام پاپيللوما ۆيرۋسىنا (ا پ ۆ) قارسى ۆاكسينا تەك قىز بالالارعا ەگىلىپ جاتىر.

- ادام پاپيللوما ۆيرۋسىنا (ا پ ۆ) قارسى ۆاكسينا ا ق ش، اۋستراليا، كانادا ەلدەرىندە 2007-2008 -جىلدارى كلينيكالىق زەرتتەۋدەن ءوتىپ، ەنگىزىلگەن. بۇل مەملەكەتتەر ۆاكسينانىڭ وڭ اسەرىن كورىپ وتىر. ويتكەنى، سىرقاتتانۋشىلىق پەن ۆيرۋستىڭ اينالىمى تومەندەگەن. ول مەملەكەتتەر قىزداردان باستاپ، بۇگىندە 76 مەملەكەت ۇلدار اراسىندا دا ۆاكسيناتسيا جۇرگىزەدى، ويتكەنى ەركەكتەردە ۆيرۋس تاسىمالداۋشىسى بولۋى مۇمكىن، - دەدى دەنساۋلىق ساقتاۋ مينيسترلىگى جانىنداعى ۇلتتىق قوعامدىق دەنساۋلىق ساقتاۋ ورتالىعى باسقارما ءتوراعاسىنىڭ ورىنباسارى مانار سماعۇل ادام پاپيللوما ۆيرۋسىنا قارسى ۆاكسيناتسياعا ارنالعان ءىس-شارا بارىسىندا.

ماماننىڭ مالىمدەۋىنشە، قازاقستاندا ادام پاپيللوما ۆيرۋسىنا (ا پ ۆ) قارسى 4 ۆالەنتتى ۆاكسينا ەگىلىپ جاتىر، شەت مەملەكەتتەر 2015 -جىلدان باستاپ 9 ۆالەنتتى ۆاكسيناعا كوشكەن.

وسى ورايدا Kazinform ءتىلشىسى مينيسترلىك وكىلىنە قازاقستاندا ەر بالالار اراسىندا ادام پاپيللوما ۆيرۋسىنا  قارسى ۆاكسينا ەگىلۋى مۇمكىن بە دەگەن ساۋال قويدى.

- جوسپاردا بار، ويتكەنى قاتەرلى ىسىكتىڭ الدىن الۋدا وتە جوعارى تيىمدىلىگىن كورسەتەدى. قاشان ەكەنىن ايتا المايمىن، - دەپ قىسقا قايىردى سپيكەر.

ايتا كەتسەك، بۇگىن ەلوردادا ۇلتتىق قوعامدىق دەنساۋلىق ساقتاۋ ورتالىعىنىڭ ۇيىتقى بولۋىمەن ادام پاپيللوما ۆيرۋسىنا  قارسى ەكپە ەگۋ شاراسى اياسىندا كونفەرەنسيا ءوتتى. اتالعان شاراعا سالا ماماندارى قاتىستى.

ەسكە سالا كەتەيىك، بىلتىر قىركۇيەكتە ەلىمىزدە جاتىر موينى وبىرىنىڭ نەگىزگى قوزدىرعىشى - ادام پاپيللوما ۆيرۋسىنا  قارسى قىزداردى جالپى ۆاكسينالاۋ باستالدى. وسى ورايدا Kazinform اگەنتتىگىنىڭ ءتىلشىسى قازاقستاندا اتالعان ينفەكسيانىڭ تارالۋ ستاتيستيكاسى قانداي، بۇل ۆيرۋس نە ءۇشىن قاۋىپتى جانە نەگە ەكپە الۋ قاجەت ەكەنىنە شولۋ جاساعان ەدى.

وتكەن جىلى ۇكىمەت ادام پاپيللوماسى ۆيرۋسىنا قارسى ۆاكسينا ساتىپ الۋعا 9,7 ميلليارد تەڭگەدەن استام قارجى ءبولدى.

سونداي-اق ەلىمىزدە ادام پاپيللوما ۆيرۋسىنا قارسى ۆاكسينانىڭ دەنساۋلىققا اسەرى زەرتتەلىپ جاتقانى ايتىلدى.

ودان بولەك، الەۋمەتتىك جەلىلەردە جانە مەسسەندجەرلەردە ادام پاپيللوماسى ۆيرۋسى ۆاكسيناتسياسى بەدەۋلىككە اكەلەتىنى تۋرالى جالعان اقپارات تارادى.

اۆتور

داۋلەت ىزتىلەۋ