ەلىمىزدە «قۇرمەتتى دونور» توسبەلگىسى قايتا بەرىلە باستايدى

استانا. KAZINFORM - ەلىمىزدە «قۇرمەتتى دونور» توسبەلگىسى قايتادان بەرىلە باستايدى. بۇل جايىندا سەنات دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى تامارا دۇيسەنوۆانىڭ جاۋابىندا ايتىلعان.

«قازاقستاندا دونورلىق قاندى دايىنداۋدى 19 قان ورتالىعى جۇزەگە اسىرادى. ولار ترانسفۋزيالىق كومەك كورسەتەتىن شامامەن 420 ۇيىمدى قان كومپونەنتىمەن قامتاماسىز ەتەدى. جىل سايىن 250 مىڭنان استام قان تاپسىرىلىپ، 380 قان قۇيۋ شاراسى جۇرگىزىلەدى. 100 مىڭنان استام ادام دونورلىق قان الادى»، - دەدى ۇكىمەت باسشىسىنىڭ ورىنباسارى جاۋابىندا.

ونىڭ دەرەگىنشە، مەديتسينا ۇيىمدارىنىڭ جوسپارلى جانە شۇعىل وتىنىمدەرىنىڭ ءبارى تولىق كولەمدە قاناعاتتاندىرىلىپ وتىر.

«مەملەكەتتىك جانە قوعامدىق ۇيىمداردىڭ جاردەمىمەن قان دونورلاردى جۇمىلدىرىلىپ، ىنتالاندىرىلىپ وتىرادى. قان دونورلارىن دەنساۋلىق ساقتاۋدى دامىتۋعا ۇلەس قوسقان تۇلعالارمەن تەڭەستىرۋ ماقساتىندا 2009 -جىلى جويىلعان «قۇرمەتتى دونور» توسبەلگىسىن قالپىنا كەلتىرۋ جۇمىسى جۇرگىزىلىپ جاتىر. قازىرگى ۋاقىتتا توسبەلگىسىنىڭ ديزاينى ازىرلەنىپ جاتىر»، - دەدى تامارا دۇيسەنوۆا.

اۆتور

مارلان جيەمباي