ەلىمىزدە قانداي ءداستۇرلى مەديتسيناعا رۇقسات بەرىلگەن
استانا. KAZINFORM - پرەمەر-مينيستر ولجاس بەكتەنوۆ سەنات دەپۋتاتتارىنىڭ ساۋالىنا وراي ەلىمىزدە قانداي ءداستۇرلى مەديتسيناعا رۇقسات بەرىلگەنىن ايتتى.
- دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىمىنا سايكەس ءداستۇرلى (حالىقتىق) مەديتسينا تاسىلدەرىن دياگنوستيكا، ەمدەۋ جانە پروفيلاكتيكا ءۇشىن قوسىمشا ءتيىستى رۇقساتى بار مەديتسينا قىزمەتكەرلەرىنىڭ عانا پايدالانۋىنا بولادى. بۇگىندە ەلىمىزدە تەك دالەلدى جانە ءداستۇرلى مەديتسينا ادىستەرىن قولدانۋعا رۇقسات ەتىلگەن. قولدانىستاعى زاڭناماعا سايكەس ءداستۇرلى مەديتسينانىڭ بىرنەشە تۇرىنە (گومەوپاتيا، رەفلەكسوتەراپيا، فيتوتەراپيا، مانۋالدىق تەراپيا، گيرۋدوتەراپيا، سۋ-دجوك تەراپيا) رۇقسات بەرىلگەن، - دەدى ۇكىمەت باسشىسى جاۋابىندا.
ونىڭ اتاپ وتۋىنشە، مەديتسينالىق قىزمەتتىڭ وسى تۇرلەرىن جۇزەگە اسىرۋ ءۇشىن مەملەكەتتىك ليتسەنزيا مەن مامان سەرتيفيكاتى قاجەت.
- جوعارىدا اتالعان مەديتسينا تۇرلەرىنە جاتپايتىن ەمدەۋ ادىستەرى زاڭسىز كاسىپكەرلىك نەمەسە مەديتسينالىق قىزمەت سانالادى. زاڭسىز مەديتسينالىق قىزمەت كورسەتكەن جاعدايدا اكىمشىلىك جانە قىلمىستىق جاۋاپكەرشىلىك قاراستىرىلعان، - دەدى پرەمەر-مينيستر.
ولجاس بەكتەنوۆتىڭ جاۋابىنا بەرىلگەن انىقتاماعا سايكەس، مەديتسينالىق قىزمەتتى ليتسەنزيالاۋ ءراسىمى 2015 -جىلدان باستاپ اۆتوماتتاندىرىلعان جانە «ە- License» پورتالى ارقىلى كورسەتىلەدى. پورتالدا «رۇقسات بەرۋ قۇجاتىن ىزدەۋ» قوسىمشا بەتىنەن ءاربىر ازامات (ماماننىڭ ج س ن، ب س ن دەرەكتەرى بويىنشا) ماماننىڭ جانە ءداستۇرلى مەديتسينالىق ورتالىقتاردىڭ رۇقسات بەرۋ قۇجاتىنىڭ بار-جوعىن كورۋگە مۇمكىندىگى بار.
ايتا كەتەيىك، گارۆارد جانە ستەنفورد ۋنيۆەرسيتەتتەرى عالىمدارىنىڭ بىرلەسكەن زەرتتەۋىنە سايكەس، جاساندى ينتەللەكت ادامدارعا قاراعاندا دالىرەك دياگنوز قويا الادى.
