ەلىمىزدە نەگە سيىر ەتى قىمبات - مينيستر جاۋابى

استانا. KAZINFORM - اۋىل شارۋاشىلىعى ءمينيسترى ايداربەك ساپاروۆ ەلىمىزدە سيىر ەتى باعاسىنىڭ ءوسۋ سەبەبىن ءتۇسىندىردى.

مينيستر كەلتىرگەن مالىمەتكە سۇيەنسەك، قازىر ەلىمىزدە ءبىر كەلى سيىر ەتىنىڭ ورتاشا باعاسى 2960 تەڭگە. ال ءتىرى كۇيىندە وڭىرلەردەگى باعاعا بايلانىستى 1250-1500 تەڭگە ارالىعىندا ساتىلىپ جاتىر.

- سويىلعاننان كەيىن شامامەن %50 ەت قالادى. وسىعان سايكەس، ەت باعاسى 2700-2800 تەڭگە كولەمىندە قالىپتاسادى. الايدا بولشەك ساۋداداعى باعانى باقىلاۋ قيىن، ويتكەنى باعا ۇستەمەسىن ساۋدا ورىندارى مەن دەلدالدار بەلگىلەيدى، - دەدى ايداربەك ساپاروۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا.

وسى ورايدا مينيستر ساۋدا جانە ينتەگراتسيا مينيسترلىگىمەن بىرلەسىپ ۇستەمە جانە شەكتى باعاعا مونيتورينگ جۇرگىزىلىپ جاتقانىن ايتا كەلە، جەكەلەگەن جاعدايدا ايىپپۇل سالىناتىنىن ەسكەرتتى.

ۆەدومستۆو باسشىسىنىڭ ايتۋىنشا، ەلىمىزدە ەت جەتكىلىكتى، ەكسپورتتىق الەۋەت تە ساقتالعان. وتكەن جىلى 22 مىڭ توننادان استام سيىر ەتى ەكسپورتتالدى، بۇل شامامەن 122 مىڭ ءىرى قارا مەن 1 ميلليونعا جۋىق قوي.

- نەگىزگى پروبلەما - قايتا ساتۋ تىزبەگىندە بولىپ وتىر. فەرمەرلەر ءونىمدى وزىندىك قۇنىنان تومەن باعادا ساتۋعا دايىن ەمەس، سەبەبى مال ءوسىرۋ ۇلكەن شىعىندى تالاپ ەتەدى. 3500 تەڭگە كولەمىندەگى باعا - ەكونوميكالىق تۇرعىدان نەگىزدەلگەن. كورشى مەملەكەتتەردە، مىسالى، وزبەكستان، تۇرىكمەنستان مەن تاجىكستاندا ەتتىڭ باعاسى 6 مىڭ تەڭگەگە دەيىن جەتەدى. قازاقستان ەتپەن تولىق قامتاماسىز ەتىلگەن. دەلدالدار اراسىنداعى رەتسىزدىكتى جويۋ ماڭىزدى، سوندا جاعداي تۇراقتالادى. جالپى، ەت باعاسى تۇراقتى، - دەدى مينيستر.

بۇعان دەيىن حابارلاعانىمىزداي ەندى قازاقستاندىقتاردىڭ ەتتى فەرمەرلەردەن تىكەلەي ونلاين ساتىپ الا الۋ مۇمكىندىگى بولادى.