ەلىمىزدە مۇعالىمدەر جەتكىلىكتى مە
استانا. KAZINFORM - ەلىمىزدىڭ وڭىرلەرىندە مۇعالىم تاپشىلىعى ءالى دە بار ما؟ قاي پاندەر بويىنشا مۇعالىمدەر جەتىسپەيدى؟ بۇل سۇراقتارعا وقۋ-اعارتۋ مينيسترلىگى جاۋاپ بەردى.
- 2025 -جىلعى 1-اقپانداعى جاعداي بويىنشا مەملەكەتتىك ءبىلىم بەرۋ ۇيىمدارىندا ەكى مىڭنان استام بوس ورىندار بار. اتاپ ايتساق، ماتەماتيكا، فيزيكا پاندەرى جانە باستاۋىش سىنىپ مۇعالىمدەرى بويىنشا بوس ورىندار تىركەلگەن. قالىپتاسقان بوس ورىندارعا ۋاقىتىلى كونكۋرس جاريالانادى، ونىڭ ءتارتىبى ءتيىستى قاعيدالارمەن ايقىندالعان. كونكۋرس ناتيجەسى شىققانعا دەيىن وقۋ جۇكتەمەسى ءپان مۇعالىمدەرى اراسىندا بولىنەدى. پەداگوگيكالىق كادرلارعا قاجەتتىلىك جوق. بوس جۇمىس ورىندارىنىڭ نەگىزگى سەبەپتەرى - تۇرعىلىقتى جەرىن اۋىستىرۋ، باسقا جۇمىسقا اۋىسۋ، زەينەتكەرلىك جاسقا جەتۋ، دەكرەتتىك دەمالىسقا شىعۋ، مەرزىمدى اسكەري قىزمەت، وقۋ جانە شەتەلدىك تاعىلىمدامالار، ماگيستراتۋرا مەن دوكتارانتۋراعا وقۋعا ءتۇسۋ، جاڭا مەكتەپتەردىڭ اشىلۋى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
سوڭعى بەس جىلدا پەداگوگيكالىق باعىتتار بويىنشا جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارى تۇلەكتەرىنىڭ سانى جىل سايىن شامامەن 50 مىڭ ادام بولىپ وتىر. ەڭبەك نارىعىندا پەداگوگيكالىق ماماندار جەتكىلىكتى ۇسىنىلعان. سونىمەن قاتار، پەداگوگيكالىق ماماندىقتار بويىنشا گرانتتار سانى جىلدان-جىلعا ارتىپ كەلەدى. ماسەلەن، 2022 -جىلى - 15273 گرانت، 2023 -جىلى - 15923، ال 2024 -جىلى 15973 گرانت ءبولىندى.
مۇنىمەن قوسا، جەرگىلىكتى اتقارۋشى ورگاندار تاراپىنان پەداگوگ مامانداردى دايارلاۋعا ارنالعان ءبىلىم بەرۋ گرانتتارى جىل سايىن ارتىپ كەلەدى.
- قازىرگى كەزدە دارىندى جاستار اراسىنان پەداگوگيكالىق ماماندىقتارعا تۇسەتىندەردىڭ سانى ارتىپ كەلەدى. 2023 -جىلى «التىن بەلگى» توسبەلگىسىنىڭ يەگەرلەرىنە 1528 گرانت، 2024 -جىلى 1797 گرانت بەرىلدى. سونىمەن قاتار، پەداگوگيكالىق ءبىلىمى جوق ادامدار ءۇشىن جوعارى وقۋ ورىندارىندا پەداگوگيكالىق قايتا دايارلاۋدان كۋرستار ءوتىپ، ءبىلىم بەرۋ ۇيىمدارىنا جۇمىسقا ورنالاسادى. جاس مۇعالىمدەردى ءبىلىم بەرۋ ۇيىمدارىنا جۇمىسقا تارتۋ ءۇشىن «ديپلوممەن اۋىلعا» ارنايى باعدارلاماسى جۇزەگە اسىرىلىپ وتىر. 2021 -جىلدان باستاپ مۇعالىمدەردى جۇمىسقا قابىلداۋ كونكۋرستىق نەگىزدە جۇزەگە اسىرىلادى، - دەپ اتالىپ وتكەن ۆەدومستۆو اقپاراتىندا.
ايتا كەتەيىك، 2024 -جىلى تامىز ايىنىڭ اياعىندا قازاقستان مەكتەپتەرىندە 398854 پەداگوگ جۇمىس ىستەپ جاتقانى حابارلاندى.
بۇعان دەيىن «التىن بەلگى» يەگەرلەرى پەداگوگيكا ماماندىقتارىن ءجيى تاڭداي باستاعانىن جازعان ەدىك.
اۆتور
رۋسلان عابباسوۆ
