ەلىمىزدە ۇلتتىق ستاندارت جوبالارىن جاساندى ينتەللەكت ساراپتايدى
استانا. KAZINFORM - قازاقستاندا ۇلتتىق ستاندارت جوبالارىن ساراپتاۋ ۇدەرىسىنە جاساندى ينتەللەكتىنى قولدانۋ جوسپارلانىپ وتىر.
ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا ۇلتتىق ستاندارتتى ازىرلەۋ بارىسىندا جاساندى ينتەللەكتىنى قولدانۋ ماسەلەسى قوزعالدى.
- قازىر ۇلتتىق ستاندارت جوبالارىنىڭ ساراپتاماسىن ادام جاسايدى، ياعني ول قولمەن جۇرگىزىلەدى. ءبىراق، ءبىز جاساندى ينتەللەكتىنى ەنگىزگىمىز كەلەدى. جاساندى ينتەللەكت ساراپتاما جاساپ، ۇقساس ستاندارتتاردى، تالاپتاردى انىقتاي الادى. بۇل قايتالاۋ بولمايدى دەگەن ءسوز، - دەدى ساۋدا جانە ينتەگراتسيا مينيسترلىگى تەحنيكالىق رەتتەۋ جانە مەترولوگيا كوميتەتىنىڭ ستاندارتتاۋ جانە تاۋارلاردىڭ شىعۋ تەگى باسقارماسىنىڭ باسشىسى نۇربەك قازبەك.
ونىڭ ايتۋىنشا، ءىس جۇزىندە جاڭا ستاندارتتار قولدانىستاعى ستاندارتتاردى قايتالايتىن جاعداي جيى كەزدەسەدى.
- جاساندى ينتەللەكتىنى ەنگىزۋ ستاندارتتار جوباسىن قولدانىستاعى نورماتيۆتەرمەن اۆتوماتتى تۇردە سالىستىرىپ، تالداۋ پروتسەسىن جەڭىلدەتۋگە جانە جەدەلدەتۋگە، سونداي-اق بولۋى مۇمكىن قاتەلىكتەر ىقتيمالدىعىن ازايتۋعا مۇمكىندىك بەرەدى، - دەپ تولىقتىردى مينيسترلىك وكىلى.
بۇعان دەيىن حابارلاعانىمىزداي، 2026-جىلدان باستاپ ۇلتتىق ستاندارتتى ازىرلەۋ مەرزىمى قىسقارادى.
