ەلىمىزدە كىمدەرگە ۇيىندە قارۋ ۇستاۋعا تىيىم سالىنعان
استانا. KAZINFORM - ىشكى ىستەر مينيسترلىگى Kazinform ساۋالىنا جولداعان جاۋاپتا ازاماتتىق ماقساتتا قارۋ ۇستاۋ قۇقىعى شەكتەلگەن ازاماتتاردىڭ ساناتىن اتادى.
- قارۋدى يەلەنۋگە مەديتسينالىق قارسى كورسەتپەلەر بولعاندا، سوتتىلىعى بولعاندا، تۇراقتى تۇرعىلىقتى جەرى بولماعاندا، قارۋدى ساقتاۋ ءۇشىن ءتيىستى جاعدايلار جاسالماعان جاعدايلاردا ىشكى ىستەر ورگاندارى ونى ساتىپ الۋعا رۇقسات بەرۋدەن باس تارتادى. مەكەنجايدىڭ شەكاراعا جاقىن ورنالاسۋىنا جانە باسقا دا ستراتەگيالىق نىساندارعا ىرگەلەس بولۋىنا بايلانىستى اتىس قارۋىن ۇستاۋعا زاڭنامادا شەكتەۋلەر كوزدەلمەگەن. زاڭناماعا سايكەس ازاماتتىعى جوق ادامداردىڭ قارۋدى ساتىپ الۋعا جانە ساقتاۋعا قۇقىعى جوق، - دەپ جازادى مينيسترلىكتەگىلەر.
زاڭ بويىنشا پوليتسيا وكىلدەرى ۇيىندە ازاماتتىق ماقساتپەن قارۋ ساقتايتىن ادامداردى جىلىنا ءبىر رەت تەكسەرىپ وتىرۋى كەرەك.
- قازىرگى ۋاقىتتا قارۋدى يەلەنۋدى شەكتەۋ جونىندەگى شارالاردى كۇشەيتۋدى كوزدەيتىن وزگەرىستەر جوسپاردا جوق. 2025-جىلدىڭ باسىنان قارۋ ساقتاۋدىڭ تالاپتارىن بۇزعان 1200 فاكت انىقتالدى. ونىڭ ىشىندە قارۋدى ساقتاۋ جانە الىپ ءجۇرۋ قاعيدالارىن بۇزعانى ءۇشىن – 677، تىركەۋ جانە قايتا تىركەۋ قاعيدالارىن بۇزعانى ءۇشىن - 591 ادام اكىمشىلىك جاۋاپكەرشىلىككە تارتىلدى.
قۇقىق بۇزۋشىلىق جاساعان قارۋ يەلەرى قارۋدى قاۋىپسىز ۇستاۋ قاعيدالارىن ءبىلۋىن تەكسەرۋ ءۇشىن ەمتيحاندى قايتا تاپسىرۋعا جولدانادى. ەمتيحان تاپسىرماعان جاعدايدا رۇقساتتىڭ كۇشى جويىلادى، - دەپ جازىلعان جاۋاپتا.
كەشە عانا بىرنەشە وبلىستا قاڭتار وقيعاسى كەزىندە ۇرلانعان قارۋ-جاراقتار تابىلعانى حابارلانعان ەدى.
