ەلىمىزدە كومپيۋتەر قۇراستىرۋ كولەمى 4,4 ەسە ارتقان

استانا. KAZINFORM - ەلىمىزدە كومپيۋتەر مەن نوۋتبۋك قۇراستىرۋ كولەمى ءبىر جىلدىڭ ىشىندە 4,4 ەسە ارتقان. بۇل تۋرالى Energyprom.kz رەسۋرسىنىڭ ساراپتاماسىندا ايتىلعان.

«قازاقستاندا كومپيۋتەر مەن نوۋتبۋك ءوندىرىسى ءبىر جىلدا 4,4 ەسە ارتىپ، 2024 -جىلدىڭ قاڭتارى مەن اقپانىندا 6,1 مىڭ داناعا جەتتى. بۇل - 2013 -جىلدان بەرگى ەڭ ۇلكەن كورسەتكىش. 2013 -جىلدىڭ قاڭتارى مەن جەلتوقسانىنىڭ اراسىندا سەكتورداعى ءوندىرىس كولەمى 83,4 مىڭ دانا بولعان ەدى. 10 جىل وتكەننەن كەيىن بۇل كورسەتكىش 11,7 مىڭ عانا بولدى» دەپ جازىلعان ساراپتامادا.

ماتەريال اۆتورى بۇل مالىمەت رەسمي ستاتيستيكادا وتاندىق ءوندىرىس رەتىندە سيپاتتالعانىمەن ءىس جۇزىندە قۇراستىرۋ كولەمى عانا ەكەنىن ەسكەرتەدى.

«رەسمي ستاتيستيكا دەرەكتەرى بويىنشا قازاقستاندىق زاۋىتتار 2023 -جىلدىڭ 12 ايىندا ەسەپتەۋشى سيفرلىق ماشينالارعا ىشكى سۇرانىستىڭ %23,2 ىن قامتاماسىز ەتكەن. ءبىر جىل بۇرىن بۇل كورسەتكىش %21 بولاتىن. اشىعىن ايتايىق، قازاقستاندا ساتىلعان ءاربىر ءتورتىنشى كومپيۋتەر وتاندىق ءونىم دەگەندى ەلەستەتۋ قيىن. ءبىز ول جاعىنا توقتالمايمىز، تەك ۇلتتىق ستاتيستيكا بيۋروسى بەرگەن رەسمي دەرەكتەردى ۇسىنىپ وتىرمىز» دەپ جازادى Energyprom.kz.