ەلىمىزدە كوكتەمگى تاسقىنعا قاراماستان 26 ميلليون توننادان استام استىق جينالدى
استانا. KAZINFORM - مەملەكەت باسشىسى قاسىم-جومارت توقايەۆ رەسپۋبليكا كۇنىنە وراي وتكەن سالتاناتتى جيىندا اۋىل شارۋاشىلىعىنىڭ دامۋ قارقىنىنا توقتالدى.
پرەزيدەنت قازاقستان الەمدىك ازىق-تۇلىك نارىعىنداعى ءرولىن كۇشەيتە بەرەتىنىن اتاپ ءوتتى.
- بۇل - ازىق-تۇلىك قاۋىپسىزدىگىن قامتاماسىز ەتۋ تۇرعىسىنان ايرىقشا ماڭىزدى سالا. قازاقستان الەمدىك ازىق-تۇلىك نارىعىنداعى ءرولىن كۇشەيتە بەرەدى. قازىر كۇزگى جيىن-تەرىن ناۋقانى اياقتالىپ قالدى. ديقاندار قاۋىمىنا شىنايى ريزاشىلىق بىلدىرەمىن. كوكتەمگى تاسقىنعا قاراماستان 26 ميلليون توننادان استام استىق جينالدى. مۇنى رەكوردتىق كورسەتكىش دەۋگە بولادى. بۇعان مەملەكەت تاراپىنان كورسەتىلگەن ناقتى كومەك تە سەپتىگىن تيگىزگەنى انىق. بيىل كوكتەمگى ەگىس ناۋقانىنا بەرىلەتىن ارزان نەسيە كولەمى ءۇش ەسە كوبەيدى. اۋىل شارۋاشىلىعى تەحنيكاسىن ليزينگ ارقىلى الۋعا قوسىمشا قاراجات ءبولىندى. جالپى، اگروونەركاسىپ كەشەنىندە 865 جوبا جۇزەگە اسىرىلماق. ونىڭ قۇنى - 2,6 تريلليون تەڭگە، - دەدى قاسىم-جومارت توقايەۆ.
پرەزيدەنت ەلىمىزدەگى كاسىپكەرلىك سالاسىنىڭ وركەندەۋ جولىنا تۇسكەنىن، شاعىن جانە ورتا بيزنەس حالىقتىڭ ەكونوميكاداعى بەلسەندى بولىگىن جۇمىسپەن قامتىپ وتىرعانىن اتاپ ءوتتى. مەملەكەت باسشىسى ەلدىڭ ىسكەرلىك احۋالى مەن ينۆەستيتسيالىق تارتىمدىلىعىن ودان ءارى جاقسارتۋ ماقساتىندا مامىر ايىندا ەكونوميكانى ىرىقتاندىرۋ جونىندەگى جارلىققا قول قويعانىن جەتكىزدى.
- وتاندىق كاسىپكەرلەر ەلدەگى ماڭىزدى جوبالاردى جۇزەگە اسىرۋعا بەلسەنە اتسالىسىپ كەلەدى. ولار مەكتەپتەر، اۋرۋحانالار جانە باسقا دا الەۋمەتتىك نىساندار سالىپ جاتىر. سونداي-اق ونەركاسىپ پەن ينفراقۇرىلىمدى دامىتۋعا ينۆەستيتسيا قۇيىپ، قايىرىمدىلىق باستامالاردى قولداپ ءجۇر. بۇل - مەملەكەت پەن بيزنەس اراسىنداعى جاسامپاز سەرىكتەستىكتىڭ، بيزنەس وكىلدەرىنىڭ الەۋمەتتىك جاۋاپكەرشىلىگىنىڭ ايقىن كورسەتكىشى، - دەدى پرەزيدەنت.
