ەلىمىزدە جىل سايىن 45 توننا عانا ءجۇن جيناپ الىنادى

استانا. KAZINFORM - قۇرىلىس جانە ونەركاسىپ ءمينيسترى قانات شارلاپايەۆ ءماجىلىس دەپۋتاتتارىنىڭ سۇراعىنا بەرگەن جاۋابىندا ەلدەگى ءجۇن مەن تەرى وڭدەۋ سالاسىنىڭ احۋالى تۋرالى مالىمەت بەردى.

«ءجۇن مەن تەرى وڭدەۋدى دامىتۋ ءۇشىن بىزگە قازاقستاندا ىشكى سۇرانىستى قالىپتاستىرۋ قاجەت. قازىرگى تاڭدا جىلىنا 40-45 توننا ءجۇن جينايمىز. سونىڭ 10 پايىزىن وزىمىزدە وڭدەۋ ءۇشىن بيىل اقتوبە وبلىسىندا ۇلكەن فابريكانى ىسكە قوسامىز. ياعني، جۇننەن ەكولوگيالىق جاعىنان تازا جىلىتقىش ماتەريال جاسايمىز. وسىلايشا ىشكى سۇرانىستى جولعا قويامىز»، - دەدى مينيستر.

ونىڭ سوزىنشە قازىر تەرى ەكسپورتقا شيكىزات رەتىندە عانا كەتىپ جاتىر.

«تەرىنى قازاقستاندا وڭدەۋ ءۇشىن ىشكى سۇرانىس بولۋ كەرەك. قازىر تەك شيكىزات رەتىندە ەكسپورتتاۋ عانا بار. مينيسترلىك تاراپىنان ىشكى سۇرانىستى كوتەرۋ كەرەك. ناقتى جوبالار بولۋ ءۇشىن ىشتە سۇرانىس بولۋ قاجەت»، - دەدى قانات شارلاپايەۆ.

اۆتور

ەسىمجان ناقتىباي