ەلىمىزدە جۇك ۆاگوندارىن جاساۋ 6 ەسە ۇلعايدى
استانا. KAZINFORM - قازاقستاندا جۇك جانە جولاۋشىلار تەپلوۆوزدارى مەن ەلەكتروۆوزدار، رەفريجەراتورلىق جانە جولاۋشىلار ۆاگوندارى، رەلستەر مەن باسقا دا تەمىرجول قۇرالدارىن شىعارۋ كولەمى ارتقان.
بۇل تۋرالى ونەركاسىپ جانە قۇرىلىس ۆيتسە-ءمينيسترى ولجاس ساپاربەكوۆ ءمالىم ەتتى.
«تەمىر جول ماشينالارىن جاساۋ وندىرىسىندە جۇك ۆاگوندارىنىڭ ءوندىرىسى 6 ەسە ۇلعايدى، 2024 -جىلعا ارنالعان جوسپار 4 مىڭ جۇك ۆاگونىن جاساۋ. سونىمەن قوسا وتاندىق ونەركاسىپ ونىمدەرىن ەكسپورتتايمىز. ونىڭ قاتارىندا جۇك جانە جولاۋشىلار تەپلوۆوزدارى مەن ەلەكتروۆوزدار، رەفريجەراتورلىق جانە جولاۋشىلار ۆاگوندارى، رەلستەر مەن باسقا دا تەمىرجول قۇرالدارى بار. مىسالى، تەمىرجول رەلستەرى %50- عا180 مىڭ تونناعا ارتىق ءوندىرىلدى. ءبىز رەلستەرمەن قازاقستان تەمىر جولى كومپانياسىنىڭ قاجەتتىلىگىن وتەيمىز، قالعان كولەمىن وزبەكستان، گرۋزيا، ءازىربايجان، يتاليا جانە ۇلىبريتانياعا ەكسپورتتايمىز»، - دەدى ولجاس ساپاربەكوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
مينيستر ورىنباسارىنىڭ ايتۋىنشا، وتاندىق كولىك سالاسىنىڭ الدىندا ترانسكاسپي ءدالىزى مەن سولتۇستىك- وڭتۇستىك جۇك اينالىمىن دامىتا ءتۇسۋ مىندەتى تۇر.
«مەملەكەت باسشىسى اتاپ وتكەندەي ەكونوميكانى دامىتۋداعى «ەڭ باستى مىندەت - ەلدىڭ بەرىك ونەركاسىپتىك قۇرىلىمىن قالىپتاستىرۋ، ەكونوميكالىق ءوزىن- ءوزى قامتاماسىز ەتۋ. سوندىقتان وڭدەۋ سەكتورىنىڭ جەدەل دامۋىنا باستى نازار اۋدارۋ قاجەت. اتاپ ايتقاندا، ەلدە باسەكەگە قابىلەتتى جانە ەكسپورتقا باعىتتالعان وڭدەۋ ونەركاسىبىن قۇرۋ. سول ارقىلى ەلدىڭ ەكونوميكالىق- ونەركاسىپتىك الەۋەتىن ارتتىرۋ»، - دەيدى ول.
ايتا كەتسەك، مەملەكەت باسشىسىنىڭ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا بەرىلگەن تاپسىرمالارىن ورىنداۋ اياسىندا ۇكىمەت ەكونوميكانى ءارتاراپتاندىرۋ، وتاندىق ءوندىرىستى ىنتالاندىرۋ جانە وفتەيك- كەلىسىمشارتتار جۇيەسىن تولىق ىسكە قوسۋ بويىنشا ءبىرقاتار جۇيەلى شارالار قابىلدادى.
اۆتور
داۋلەت ىزتىلەۋ
