ەلىمىزدە جاساندى ينتەللەكت وقۋشىلارعا باعا قوياتىن بولادى
استانا. قازاقپارات - الداعى ۋاقىتتا جاساندى ينتتەلەكت ءبىلىم الۋشىلارعا سىرتتاي باعا بەرمەك. بۇل تۋرالى وقۋ-اعارتۋ ءمينيسترى عاني بەيسەمبايەۆ مالىمدەدى، دەپ حابارلايدى BAQ. KZ.
وقۋ-اعارتۋ مينيسترلىگى مەملەكەتتىك جالپىعا مىندەتتى ءبىلىم بەرۋ ستاندارتىنا جاساندى ينتەللەكتى وقىتۋ ەلەمەنتتەرىن ەنگىزۋ بويىنشا جۇمىس جۇرگىزۋدە. قازىرگى تاڭدا جاساندى ينتەللەكت كومەگىمەن ءبىلىم الۋشىلاردى سىرتتاي باعالاۋعا ارنالعان تاپسىرمالاردى ازىرلەۋ ماسەلەسى دە پىسىقتالۋدا، - دەدى بەيسەمبايەۆ استانا قالاسى پەداگوگتەرىنىڭ تامىز فورۋمىندا.
ءمينيستردىڭ سوزىنشە، مەملەكەتتىك باقىلاۋدىڭ ءبىرقاتار تەتىكتەرى قايتا قارالماق.
بىرىنشىدەن، 2024 -جىلدان باستاپ ليتسەنزيالاۋ كەزىندە جاڭا بىلىكتىلىك تالاپتارىنا سايكەستىگىن تەكسەرۋدىڭ جاڭا فورماسى ەنگىزىلدى. ەكىنشىدەن، ايماقتىق ءبىلىم باسقارمالارى مەن اۋدان/قالالىق ءبىلىم بولىمدەرىن جوسپارلى تەكسەرۋلەردى جۇزەگە اسىرۋ بويىنشا جاڭا نورمالار قابىلداندى. ۇشىنشىدەن، مەملەكەتتىك باقىلاۋ نىساندارى قايتا قاراستىرىلادى. مەملەكەتتىك باقىلاۋدىڭ بۇل فورماتى اكىمشىلىك كەدەرگىلەردى 2,5 ەسە تومەندەتەدى جانە قويىلاتىن تالاپتاردى 290 نان 116 عا دەيىن قىسقارتۋدى كوزدەپ وتىر، - دەدى بەيسەمبايەۆ.
مينيستر ءبىلىم ساپاسىن باعالايتىن ۇلتتىق جۇيەنىڭ جاڭا مودەلى قالىپتاسقانىن اتاپ ءوتتى.
بۇگىنگى تاڭدا وقۋلىقتاردىڭ %100ى تسيفرلىق فورماتقا اۋىستىرىلدى. ولار قازىر 11 پلاتفورمادا قول جەتىمدى، - دەپ تۇيىندەدى ول.
ەسكە سالايىق، بۇعان دەيىن مينيستر عاني بەيسەمبايەۆ ەلىمىزدە قانشا ءۇش اۋسىمدى مەكتەپ بار ەكەنىن ايتقان ەدى.
