ەلىمىزدە ءمايىتتى سويىپ تەكسەرمەي-اق ءولىم سەبەبىن انىقتايتىن تەحنولوگيا ەنگىزىلمەك

استانا. KAZINFORM - ەلىمىزدە ومىردەن وزعان ادامنىڭ ولىمىنە نە سەبەپ بولعانىن انىقتاۋ ءۇشىن ۆيرتۋالدى اۋتەپسيا قولدانۋ مۇمكىندىگى قاراستىرىلىپ جاتىر. بۇل تۋرالى ادىلەت مينيسترلىگىنىڭ رەسمي وكىلى تالعات ءۋالي ايتتى.

- تەحنولوگيانىڭ دامۋى جاعدايىندا ۆيرتۋالدى اۋتوپسيانى قولدانۋ مۇمكىندىگى پايدا بولادى. ۆيرتۋالدى اۋتەپسيا - بۇل دەنەنىڭ ەگجەي- تەگجەيلى پروەكتسياسىن الۋ ءۇشىن ك ت سكانەرى ارقىلى ادامنىڭ ينۆازيۆتى ەمەس اۋتوپسيالارى ورىندالاتىن جاڭا مەديتسينالىق تەحنولوگيا. قۇقىق قورعاۋ ورگاندارىنىڭ ءمايىتتى سوت-مەديتسينالىق ساراپتاۋ كەزىندە ساراپشىلاردىڭ الدىنا قوياتىن نەگىزگى مىندەتى - ءولىمنىڭ سەبەبىن انىقتاۋ. زەرتتەۋ ەنگىزىلەتىن بولسا كەي جاعدايلاردا مايىتتەردى سويىپ تەكسەرۋدىڭ قاجەتتىلىگى بولمايدى. كەي جاعدايلاردا ۇلتتىق جانە ءدىني سالت-داستۇرلەرگە سۇيەنىپ قازا بولعان ادامنىڭ جاقىندارى ءمايىتتى كەسپەۋدى سۇرايدى، - دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، ۆيرتۋالدى اۋتوپسيا ءادىسى بەلگىلى ءبىر دارەجەدە شۆەيتساريادا، ۇلى بريتانيادا، ا ق ش- تا، ءۇندىستاندا، جاپونيادا، شۆەتسيادا، نورۆەگيادا، تۇركيادا، ساۋد ارابياسىندا، رەسەيدە قولدانىلادى.

- قازاقستاندا قولدانىستا جوق. ونى ەنگىزسەك دەپ زەرتتەپ جاتىرمىز. سوت-ساراپتامالىق ورتالىعىنىڭ ماماندارى وسى ءادىستى قولدانىپ جاتقان ەلدەرگە ءىس-ساپارعا بارىپ، ءادىستىڭ قانداي پايداسى، زيانى بارىن زەرتتەپ جاتىر. ك ت سكانەرى - وتە قىمبات قۇرىلعى. سوندىقتان قانداي قۇرىلعىنى قاي ەلدەن دۇرىس دەگەن ماسەلە پىسىقتالىپ جاتىر. ۇلتتىق سالت-داستۇرىمىزگە، ءدىني نانىم-سەنىمىمىزگە بايلانىستى ازاماتتار ءمايىتتى كەسپەۋدى سۇراپ جاتادى. ءبىراق ساراپتاما جۇرگىزەتىن ماماندار زاڭ الدىندا جاۋاپ بەرەدى. سوندىقتان ءمايىتتى كەسۋ ارقىلى جۇرگىزىلەتىن بۇل ساراپتامانىڭ جۇرگىزىلۋى مىندەتتى، - دەدى تالعات ءۋالي.

قوعامدا ولىمنەن كەيىنگى اعزا دونورلىعى ماسەلەسى ءجيى كوتەرىلەدى. سەبەبى دونورعا مۇقتاج ناۋقاستار سانى جىل سايىن ارتۋدا. كەزەگىنە جەتپەي، ەرتە كوز جۇماتىندار جەتەرلىك. وسى ورايدا سالاداعى جاڭالىق پەن بەتبۇرىستى ءبىلۋ ءۇشىن ترانسپلانتتاۋدى جانە جوعارى تەحنولوگيالىق مەديتسينالىق قىزمەتتى ۇيلەستىرۋ جونىندەگى رەسپۋبليكالىق ورتالىق ديرەكتورىنىڭ ورىنباسارى نازگۇل جىلگەلدينامەن سۇحباتتاسقان ەدىك.