ەلىمىزدە ءۇش جىل ىشىندە پاتەر باعاسى 40 پايىزعا وسكەن

ءۇش جىلدا قازاقستاننىڭ ەكىنشى نارىعىندا پاتەر قۇنى شامامەن 40 پايىزعا ءوستى. 2021-2024-جىلدار ارالىعىنداعى ۇسىنىستارعا تالداۋ جاساعان Krisha.kz ساراپشىلارى وسىنداي قورىتىندى جاسادى.

بارلىق وڭىردە باعا وسكەنى بايقالدى.

قىمباتشىلىققا سۇرانىستىڭ ارتۋى، زەينەتاقى قورىنان اقشا الۋعا رۇقسات بەرۋ، دوللار باعامىنىڭ ءوسۋى، قۇرىلىس ماتەريالدارىنىڭ قىمباتتاۋى (ءبىرىنشى نارىقتاعى وزگەرىس ۇستالعان ۇيگە دە اسەرىن تيگىزەدى)، 2022-جىلى قۇرىلىس قارقىنىنىڭ باسەڭدەۋى ىقپال ەتتى.

ءۇش جىلدا باعا قالاي قۇبىلدى؟

2021-جىلى ەل بيلىگى زەينەتاقى قورىنان ارتىق اقشا الۋعا رۇقسات بەردى. سالدارىنان اجيوتاج بولىپ، ءۇي باعاسىنىڭ شارىقتاۋىنا اكەلدى. ءبىر جىلدا ەل ازاماتتارى شامامەن 2,5 تريلليون تەڭگە شەشىپ العان. تۇرعىن ۇيمەن بايلانىستى مامىلە سانى ونىڭ الدىنداعى جىلمەن سالىستىرعاندا ەكى ەسە ءوستى (609 مىڭ - ەسك.). ەكىنشى نارىقتا پاتەر قۇنى 27 پايىزعا وسسە، جاڭا ۇيلەر ءتىپتى 40 پايىزعا قىمباتتادى.

2022-جىلى بيلىك قوردان الۋعا رۇقسات بەرىلگەن سومانى 70 پايىزعا ارتتىرعاندىقتان، زەينەتاقى قورىنا جۇگىنگەن، ۇي ىزدەگەن ەلدىڭ قاراسى ازايىپ قالدى. الايدا قۇرىلىس ماتەريالدارى مەن جۇمىس اقىسى كوتەرىلگەن سوڭ باسپانا قۇنى شارىقتاي بەردى. ءبىر جىلدا مۇلىك يەلەرى قولدان ساتقان پاتەرلەردىڭ ورتاشا باعاسى تاعى 10 پايىزعا ءوستى.

بىلتىر نارىق ءبىرشاما تۇراقتادى. 1-توقساندا باعا ازداپ كوتەرىلگەنمەن، جاز اياعىنا قاراي قايتا ءتۇستى، ال كۇزدە مۇلدە توقتاپ قالدى، قىستا دا وزگەرىس بايقالمادى. ءبىر جىلدا نەبارى 1,1 پايىزعا اۋىتقىعان.