ەلىمىزدە ءبىرىنشى رەت بۇيرەكتى ايقاس ترانسپلانتتاۋ وتاسى جاسالدى

  استانا. KAZINFORM - قازاقستاندا ءبىرىنشى رەت ا. سىزعانوۆ اتىنداعى ۇلتتىق عىلىمي حيرۋرگيا ورتالىعىنىڭ بازاسىندا باسقارما ءتوراعاسى، پروفەسسور بولاتبەك بايماحانوۆتىڭ جەتەكشىلىگىمەن ەرەسەك پاتسيەنتتەرگە بۇيرەكتى ايقاس ترانسپلانتتاۋ وتاسى جۇرگىزىلدى.

Елімізде бірінші рет бүйректі бүйректі айқас  транспланттау отасы жүргізілді
Фото: gov.kz

بۇل تۋرالى دەنساۋلىق ساقتاۋ مينيسترلىگىنىڭ باسپا ءسوز قىزمەتى حابارلادى.

ايقاس ترانسپلانتاتتاۋ - بۇل كەم دەگەندە ەكى سايكەس كەلمەيتىن جۇپتان، ايقاستىرۋ ارقىلى اعزانى قوندىرۋ. بۇل وپەراتسيا دونورلاردى الماستىرۋ قاعيداتى بويىنشا ورىندالادى. ەگەر تۋىسقان دونور رەتسيپيەنتكە مەديتسينالىق كورسەتىلىمدەر بويىنشا سايكەس كەلمەسە، سونداي پروبلەماسى بار باسقا دونور تاڭدالادى.

دۇنيە جۇزىندەگى، اتاپ ايتقاندا، ءبىزدىڭ ەلىمىزدەگى دونورلىق اعزالاردىڭ تاپشىلىعى جاعدايىندا الترۋيستىك دونورلىق، ا ۆ و- سايكەس كەلمەيتىن، بۇيرەكتى ايقاس ترانسپلانتاتتاۋ بالاما بولىپ تابىلادى.

قازىر ءبىزدىڭ رەسپۋبليكامىزدا دا وسىنداي وپەراتسيالار پراكتيكاعا ەنگىزىلدى. ايقاس ترانسپلانتاتتاۋ ەكى جۇپتىڭ - قان توبى بويىنشا ءوزارا سايكەس كەلمەگەن كۇيەۋى، ايەلى جانە قىزى مەن اناسىنىڭ اراسىندا جاسالدى. بۇل پاتسيەنتتەر ۇزاق جىلدار بويى باعدارلامالىق گەمودياليزدە بولدى.

وكىنىشكە قاراي، ناۋقاستار ۇزاق ۋاقىت گەمودياليزدە بولا المايدى. ويتكەنى ۋاقىت وتە كەلە ولاردىڭ جاعدايى بىرتىندەپ ناشارلايدى. ويتكەنى گەمودياليز دونورلىق اعزاعا بالاما بولىپ تابىلمايدى.

بۇل جاعدايدا ەڭ ورىندى شەشىم وسى جۇپتاردىڭ اراسىندا بۇيرەكتى ايقاس ترانسپلانتاتتاۋ جۇرگىزۋ بولدى. مۇقيات زەرتتەپ- قاراۋدان، ۇيلەسىمدىلىكتى باعالاۋدان جانە پاتسيەنتتەردىڭ اراسىنداعى بارلىق كەلىسىمدەردى راسىمدەگەننەن كەيىن ەكى كۇننىڭ ىشىندە ەكى بۇيرەكتى ترانسپلانتاتتاۋ ءساتتى ورىندالدى، ەكى بۇيرەك تە سىڭىسە باستادى.

ەكى پاتسيەنتتىڭ دە دەنساۋلىق كورسەتكىشتەرى تەز جاقسارۋدا جانە اۋرۋحانادان شىعارۋعا دايىندالىپ جاتىر.

سوڭعى جاڭالىقتار