ەلىمىزدە بالالار فۋتبولىنىڭ دامۋ دەڭگەيى قالاي
استانا. KAZINFORM - «ەلىمىزدە بالالار فۋتبولىنىڭ دامۋىنا قانشالىقتى نازار اۋدارىلىپ وتىر؟ » دەگەن تاقىرىپتا Kazinform وي تارازىلاپ كوردى.
2001 -جىلدان بەرى الەم جۇرتشىلىعى 19 -ماۋسىمدا دۇنيەجۇزىلىك بالالار فۋتبول كۇنىن اتاپ وتەدى. بۇل مەرەكە 2001 -جىلى FIFA مەن ب ۇ ۇ بالالار قورى اراسىنداعى كەلىسىمنىڭ ارقاسىندا دۇنيەگە كەلگەن. باستى ماقسات - الەمدەگى ەڭ تانىمال سپورتتىق ءتۇرىنىڭ اياسىن ودان ءارى كەڭەيتە ءتۇسۋ، سالاۋاتتى ءومىر سالتىن ناسيحاتتاۋ. يگىلىكتى ءىس ب ۇ ۇ- نىڭ قۇرىلىمدىق بولىگى سانالاتىن يۋنيسەف تاراپى ارقىلى قولعا الىندى.
«چەلسيگە» اپارار جول...
جەر-جەردە قازىر فۋتبول ەرەكشە قارقىن الىپ كەلەدى. وعان بارلىق مەملەكەت تاراپىنان ايرىقشا نازار اۋدارىلىپ ءجۇر. بۇل تالانتتى جاستاردىڭ جارقىراپ كورىنۋىنە جول اشادى. مۇنداي قامقورلىق تالاي ورەننىڭ جۇلدىزىنىڭ جانۋىنا سەپتىگىن تيگىزدى. قازىر جانكۇيەر قاۋىمىنىڭ كوزايىمىنا اينالعان فۋتبولشىلار وسىنداي وڭ كوزقاراستىڭ ناتيجەسىندە كەڭىنەن تانىلا باستادى. بۇل جونىنەن برازيليا، ارگەنتينا، انگليا، يسپانيا، يتاليا، فرانسيا، پورتۋگاليا، بەلگيا، نيدەرلاند، دانيا الدىڭعى قاتاردان كورىنىپ كەلەدى.
- كەيىنگى جىلدارى ءبىزدىڭ ەلىمىزدە دە وعان قاتىستى ءىس-شارا جوسپارى جاسالعان. ماسەلەن، الماتىلىق «قايراتتىڭ» بالالار اكادەمياسىنا ەلىمىزدىڭ تۇكپىر-تۇكپىرىنەن تالانتتى ورەندەر جينالادى. يگىلىكتى ءىس العاشقى جەمىسىن بەرە باستادى. نەبارى 17 جاستاعى داستان ساتپايەۆتى انگليانىڭ «چەلسي» كلۋبى الداعى جىلى قاتارىنا قوسادى. بۇل - قازاق فۋتبولى ءۇشىن زور جەتىستىك. سونداي-اق اكادەميادا ءتالىم الىپ جاتقان داۋرەن ورىنباسارعا دا قازىر رەسەيلىك بەلگىلى كلۋبتار كوز تىگىپ وتىر. ارينە، ناتيجە ءبىر كۇندە كورىنە بەرمەيدى. مۇنداي اكادەميا ەلىمىزدىڭ بارلىق وڭىرىندە اشىلسا قۇبا-قۇپ. سول ارقىلى جاس تالانتتاردى تاربيەلەپ شىعارۋعا نەگىز بار. وعان ءىرى كومپانيالار مەن كاسىپكەرلەر قولداۋ بىلدىرسە دەيمىن. اكاەدميا ەلىمىزدىڭ بارلىق كاسىپقوي فۋتبول كلۋبىنىڭ جانىنان اشىلۋى ءتيىس، - دەيدى سپورت جۋرناليسى تەلجان كۇدەروۆ.
ەلىمىزدە بىلىكتى باپكەرلەر جوق دەپ ايتا المايدى. توقسانىنشى جىلداردان بەرى ءبىر عانا تاراز فۋتبولىنان باۋىرجان يسلامحان، ەركەبۇلان سەيداحمەت، باقتيەر زاينۋتدينوۆ سەكىلدى جۇلدىزداردىڭ شىعۋى كوپ جايدى ايعاقتايدى. سونداي-اق پاۆلودار، سەمەي، قىزىلوردا، شىمكەنت، اقتوبە فۋتبولى جايىندا وسىنداي وڭ پىكىر بىلدىرۋگە ابدەن بولادى. دەسە دە ولاردىڭ بىلىكتىلىگىن ارتتىرۋ ماسەلەسىن نازاردا ۇستاعانىمىز ورىندى بولادى.
تالانتتار تۋرنيردە شىڭدالادى
قازاقستان فۋتبول فەدەراتسياسى بالالار-جاسوسپىرىمدەر فۋتبولى دەپارتامەنتىنىڭ ديرەكتورى سەرگەي كەنەتايەۆ ەلىمىزدە سپورتتىڭ اتالعان تۇرىنەن جاس ورەندەردى دايىنداۋ بويىنشا كوپتەگەن ادىستەمە كەڭىنەن قولدانىلاتىنىن ايتادى. فەدەراتسيا فۋتبول ورتالىقتارى مەن اكادەميالار ءۇشىن ءبىرىڭعاي دايىندىق باعدارلاماسىن ازىرلەپ شىعاردى. ول جاس ورەندەردىڭ ۇيلەستىرۋ قابىلەتىن، قيمىل بەلسەندىلىگىن، ويىن موتيۆاتسياسىن، تەحنيكالىق-تاكتيكالىق جانە فيزيكالىق دايىندىعىن دامىتۋعا نەگىزدەلگەن. سونداي-اق باعدارلاما UEFA تالاپتارىن جانە ليتسەنزيالانعان ادىستەمەلىك ۇسىنىمداردى ەسكەرەدى.
- ەلىمىزدە جەكە فۋتبول مەكتەپتەرى بالالاردى 3-4 جاستان قابىلدايدى. ال فۋتبول ورتالىقتارى مەن اكادەميالاردا ول 6-7 جاستان باستالادى. ايتا كەتسەك، ەلىمىزدە بۇل ءىس تۇراقتى تۇردە وڭ دامۋ قارقىنىن كورسەتىپ وتىر. ەل اۋماعىندا 300-دەن استام جەكە فۋتبول مەكتەبى بار. فەدەراتسيانىڭ بالالار- جاسوسپىرىمدەر فۋتبولى دەپارتامەنتى (ب ج ف د ق ف ف) ۇيىمداستىراتىن جارىستارعا كاسىبي 19 فۋتبول ورتالىعى، 2 فۋتبول اكادەمياسى جانە قۇرامىندا دايىندىق توپتارىنىڭ كوماندالارى بار 9 فۋتبول كلۋبى قاتىسادى.
مۇنداي ءىس-شارالاردا جىل سايىن شامامەن 9000 ويىنشى باق سىنايدى. جاسوسپىرىمدەر اراسىندا رەسپۋبليكالىق بىرنەشە تۋرنير وتكىزۋ ءداستۇرى قالىپتاسقان. اتاپ ايتقاندا، «ارمان»، «جاستار»، «دارىن»، «جالىن» سەكىلدى تۋرنيرلەر بار. بىلتىر فۋتبول ورتالىقتارى مەن اكادەميالاردىڭ تاربيەلەنۋشىلەرى، سونداي-اق ءبىرىنشى جانە ەكىنشى ليگا كلۋبتارىنىڭ 12-18 جاسقا دەيىنگى جاسوسپىرىمدەر كوماندالارى اراسىندا التى جاس ساناتى بويىنشا قازاقستان چەمپيوناتى بولدى، - دەيدى س. كەنەتايەۆ.
ال ق ف ف بۇقارالىق فۋتبولى دەپارتامەنتىنىڭ ديرەكتورى نيكيتا موزگوۆويدىڭ ايتۋىنشا، ۇلتتىق عىلىمي-پراكتيكالىق دەنە تاربيەسى ورتالىعى مەن ق ف ف بۇقارالىق فۋتبول دەپارتامەنتى بىرلەسىپ ۇيىمداستىراتىن «ۇلتتىق مەكتەپ ليگاسى» جوباسى اياسىندا 5-6، 7-8، 9-11 - سىنىپتاردا وقيتىن ۇلدار مەن قىزدار اراسىندا جارىستار وتكىزىلگەن. وعان بىلتىر جالپى 855734 وقۋشى قاتىستى.
بيزنەستىڭ كوزى دەپ باعالايىق
كەزىندە قىزىلوردالىق «قايسار» كلۋبىندا ويناعان نۇرلان ءابۋوۆ وركەنيەتتى ەلدەردە فۋتبول بيزنەس كوزى ەكەنىن ايتادى. فۋتبول ورتالىقتارىندا قىزمەت جاسايتىن ماماندار مىقتى ويىنشى شىعارسا، ءوزىنىڭ ەڭبەگىنە لايىقتى اقشا الادى.
- تالاپ بويىنشا ەلىمىزدە ءار كوماندا جانىندا بالالار فۋتبولىنا ارنالعان ورتالىق بار. سول ورتالىقتا ءتالىم العان شاكىرتتەر كەيىننەن كاسىبي تۇرعىدا قايتا شىڭدالادى. وكىنىشتىسى، بارلىعى ءبىز ويلاعانداي ەمەس. ونىڭ بىرنەشە سەبەبى بار. الدىمەن باپكەرلەردىڭ بىلىكتىلىك دەڭگەيىنە نازار اۋدارىلۋى ءتيىس. الەمدە جوعارى دەڭگەيدە دامىعان بالالار فۋتبولى ورتالىقتارى بار. ولار تالاي تالانتتى جاسقا جول اشتى. ماسەلەن، بالقان تۇبەگىندەگى سەربيا، حورۆاتيا، چەرنوگوريا ورەندەرى قازىر ازۋلى كلۋبتاردا ويىن كورسەتەدى. وسىلايشا يگى ءىس ءوز دەڭگەيىندە جۇزەگە استى. الدىمەن باپكەرلەردىڭ بىلىكتىلىگىنە نازار اۋدارىپ، فۋتبولدىڭ دامۋى بويىنشا وزىق ەلدەرگە تاجىريبە الماسۋعا جىبەردى. وسىلايشا ولار قىرۋار قارجى تاۋىپ وتىر. ايتپەسە، بىزدە دە تالانتتى جاستار بار. ولارعا قامقورلىق قاجەت. ەلدىڭ اراسىنان ولاردى ىزدەپ تابۋىمىز ءتيىس. بۇل ءبىر-ەكى كۇندىك شارۋا ەمەس. اتالعان جوبالار ۇزاق مەرزىمدەرگە بەلگىلەنۋى قاجەت. دەگەنمەن بىزدە ءالى كۇنگە دەيىن وسى جاعى كەمشىن ءتۇسىپ تۇر. فۋتبولدى دامىتامىز دەسەك، وسىنداي ماسەلەلەرگە كوڭىل بولىنگەنى ورىندى، - دەيدى ول.
ونىڭ ايتۋىنشا، ەلىمىز تالانتتان كەندە ەمەس. ولاردى ىزدەپ تابۋىمىز قاجەت. بارلىق وبلىستا فۋتبول ۇيىرمەسى بار. وندا قانشاما بالا تاربيەلەنۋدە. اراسىنان تالانتتىسى شىعادى. مۇنداي شاكىرتتەر تاسادا قالىپ قويماعانى ءجون.
ايتا كەتسەك، بۇدان بۇرىن «قازاق فۋتبولى: كەشەگى كۇننەن كەلەشەككە دەيىن» دەگەن تاقىرىپتا وي قوزعاعان ەدىك.
اۆتور
ءادىلجان ۇمبەت
