ەلىمىزدە «ارقان تارتىس» فەدەراتسياسى جۇمىسىن باستادى

ارقان تارتىس الەمنىڭ 75 ەلىندە رەسمي سپورت رەتىندە تىركەلىپ، جۇيەلى جۇمىس ىستەپ كەلەدى. بۇل تۋرالى ارقان تارتىس فەدەراتسياسىنىڭ باسپا ءسوز قىزمەتى حابارلادى.

حالىقارالىق ارقان تارتىس فەدەراتسياسى حالىقارالىق وليمپيادا كوميتەتىمەن تانىلىپ، بۇگىندە تاسى ورگە دومالاعان سپورت ءتۇرى.

اتالعان سپورت بيىل ەلىمىزدە وتەتىن 5-دۇنيەجۇزىلىك كوشپەندىلەر ويىندارىنىڭ نەگىزگى باعدارلاماسىنا ەنگەن.

جاڭادان قۇرىلعان رەسپۋبليكالىق فەدەراتسيا پرەزيدەنتى بولىپ ءىلياسوۆ ەركەبۇلان سايدوللا ۇلى تاعايىندالدى. ءىلياسوۆ ەركەبۇلان سايدوللا ۇلى - «Alageum Electric» ديرەكتورلار كەڭەسىنىڭ ءتوراعاسى، «قازاقستاننىڭ ەلەكتر ماشينالارىن جاساۋ قاۋىمداستىعى» ز ت ب باسقارما ءتوراعاسى، YPO Kazakhstan مۇشەسى. 2023-جىلدان بەرى «جامبى اتۋ فەدەراتسياسى» ر ق ب پرەزيدەنتى قىزمەتىن اتقارىپ كەلەدى.

«جاڭا باسشىنىڭ تاعايىندالۋىمەن «جامبى اتۋ» سپورتى قارىشتاپ دامىپ، ەلىشىلىك بىرنەشە جارىس كەڭ كولەمدە ۇيىمداستىرىلدى. سونىمەن قاتار العاش رەت «تايتۇياق» جۇلدەسى ساراپقا سالىندى.

جاڭادان قۇرىلعان فەدەراتسيا استانادا وتەتىن V دۇنيەجۇزىلىك كوشپەندىلەر ويىنىنا ارقان تارتىستان قاتىساتىن ەل قۇراماسىن جاساقتاۋدى كوزدەپ وتىر. وسىعان وراي ەلىمىزدىڭ 5 ايماعىندا ىرىكتەۋ جارىستارى وتەدى.

جارىس Ⅱ كەزەڭنەن تۇرادى:

I كەزەڭ - ايماقتىق (ورتالىق، سولتۇستىك، شىعىس، باتىس، وڭتۇستىك) ىرىكتەۋ جارىستارى؛

Ⅱ كەزەڭ - اقتىق كەزدەسۋلەر (فينال).

ءار ايماقتىق ىرىكتەۋدە جەڭىمپاز اتانعان كوماندالار Ⅱ كەزەڭگە جولداما الادى.

1) ورتالىق ايماقتىق ىرىكتەۋ: استانا قالاسى

2) سولتۇستىك ايماقتىق ىرىكتەۋ: كوكشەتاۋ قالاسى

3) شىعىس ايماقتىق ىرىكتەۋ: سەمەي قالاسى

4) باتىس ايماقتىق ىرىكتەۋ: اتىراۋ قالاسى

5) وڭتۇستىك ايماقتىق ىرىكتەۋ: تاراز قالاسى

6) اقتىق كەزدەسۋلەر (فينال): استانا قالاسى

ەرلەر اراسىندا: 8 سپورتشى، 2 الماستىرۋشى سپورتشى، سالماق دارەجەلەرى 720 كەلى.

ايەلدەر اراسىندا: 8 سپورتشى، 2 الماستىرۋشى سپورتشى، سالماق دارەجەسى 560 كەلى.