ەلىمىزدە ادام اعزالارىن ساۋدالاۋمەن اينالىسقان ايەل پولشادا ۇستالدى
استانا. KAZINFORM — ادام اعزالارىن ساۋدالاۋمەن اينالىسقان حالىقارالىق قىلمىستىق توپتىڭ قىزمەتىنە قاتىسى بار دەپ ايىپتالعان 35 جاستاعى ايەل ۇستالدى، دەپ حابارلايدى Polisia.kz.
قۇقىق قورعاۋ ورگاندارى ق ر ىشكى ىستەر مينيسترلىگىنىڭ ينتەرپول ۇلتتىق ورتالىق بيۋروسىنىڭ سۇرانىسى بويىنشا پولشا قۇقىق قورعاۋ ورگاندارى ۋكراينا-پولشا شەكاراسىنداعى تەمىرجول وتكىزۋ پۋنكتىندە 35 جاستاعى ايەلدى ۇستادى. ول قازاقستان قۇقىق قورعاۋ ورگاندارى تاراپىنان 2020 -جىلدان بەرى حالىقارالىق ىزدەۋدە بولعان.
— ۇستالعان ازامات ادام اعزالارىن ساۋدالاۋمەن اينالىسقان حالىقارالىق ۇيىمداسقان قىلمىستىق توپتىڭ قىزمەتىنە قاتىسى بار دەگەن كۇدىككە ىلىنگەن. تەرگەۋ مالىمەتتەرىنە سايكەس، 2017-2018 -جىلدارى بۇل قىلمىستىق توپ قازاقستانداعى مەديتسينالىق مەكەمەلەردە زاڭسىز ترانسپلانتاتسيا وپەراتسيالارىن ۇيىمداستىرعان. قىلمىستىق سحەماعا يزرايل، ۋكراينا، قىرعىزستان، تاجىكستان جانە وزبەكستان ازاماتتارى تارتىلعان. الدىن الا مالىمەتتەرگە سۇيەنسەك، كۇدىكتى دونورلار مەن رەتسيپيەنتتەردى قارسى الىپ، ورنالاستىرۋ، ولاردىڭ مەديتسينالىق تەكسەرىستەن ءوتۋىن ۇيىمداستىرۋ، شىعىندارىن وتەۋ جانە قۇپيالىلىقتى ساقتاۋ جۇمىستارىمەن اينالىسقان. سونداي- اق دونورلارعا رەتسيپيەنتتەرمەن تۋىستىق بايلانىستارى تۋرالى جالعان اقپاراتتى جاتتاتقىزعان. قازىرگى ۋاقىتتا ۇستالعان كۇدىكتىنى قازاقستانعا ەكستراديتسيالاۋ ماسەلەسى قاراستىرىلىپ جاتىر. تەرگەۋ امالدارى جالعاسىپ جاتىر، - دەلىنگەن حابارلامادا.
وسىعان دەيىن تۇركىستان وبلىسىندا ەكسترەميستىك ماتەريالداردى تاراتقان توپ ۇستالعانىن جازعان ەدىك.
