ەلىمىزدە 6 جاستان اسقان بالالار شەتەلگە اتا-اناسىز ۇشا الادى
استانا. KAZINFORM - قازاقستاندا 6 جاستان اسقان بالالار اتا-اناسىز نەمەسە قامقورشىسىز ۇشاقپەن ۇشا الادى. بۇل ىشكى جانە حالىقارالىق رەيستەرگە دە قاتىستى. بۇل تۋرالى كولىك مينيسترلىگىنىڭ ماماندارى Kazinform ءتىلشىسىنىڭ ساۋالىنا بەرگەن جاۋابىندا مالىمدەدى.
- قازاقستان رەسپۋبليكاسى ينۆەستيتسيالار جانە دامۋ ءمينيسترىنىڭ 2015 -جىلعى 30- ساۋىردەگى №540 بۇيرىعىمەن بەكىتىلگەن جولاۋشىلاردى، باگاجدى جانە جۇكتەردى اۋە كولىگىمەن تاسىمالداۋ قاعيدالارىنا سايكەس، كامەلەتكە تولماعان جولاۋشىلار ەرەسەك جولاۋشىمەن بىرگە نەمەسە ونسىز دا تاسىمالدانا الادى. ەرىپ جۇرەتىن ادامدارى جوق كامەلەتكە تولماعان جولاۋشىلار رەتىندە ىشكى جانە حالىقارالىق رەيستەردە جاسى 6-دان 16-عا دەيىنگى اتا-انالارسىز جانە جولاۋشىلاردىڭ قايسىبىرىنە سەنىپ تاپسىرىلماعان بالالار تاسىمالدانادى، - دەيدى جاۋاپتىلار.
ال 6 جاسقا تولماعان جولاۋشىلار تەك اتا-اناسىمەن، قامقورشىسىمەن نەمەسە كامەلەت جاسقا تولعان، سەنىمحاتى بار ازاماتپەن بىرگە ۇشا الادى. 6 جاستان اسقاندار ەرەسەكتەرسىز ۇشۋ ءۇشىن قانداي تالاپتاردى ورىنداۋ كەرەك؟ مينيسترلىك قىزمەتكەرلەرى جاۋاپ بەردى.
- ەگەر قازاقستان رەسپۋبليكاسىنىڭ كامەلەتكە تولماعان ازاماتى ەلدەن ەرەسەك ادامنىڭ ەرتۋىنسىز شىعاتىن بولسا، وندا ونىڭ پاسپورتىنان بولەك، شىعاتىن مەرزىمى مەن باراتىن مەملەكەتى كورسەتىلگەن، اتا-اناسىنىڭ، اسىراپ الۋشىسىنىڭ، قورعانشىسىنىڭ نەمەسە قامقورشىسىنىڭ نوتاريات كۋالاندىرعان جازباشا كەلىسىمى بولۋى قاجەت. اۋە كومپانياسى كامەلەتكە تولماعان جولاۋشىنى ەرەسەك ادامنىڭ ەرتۋىنسىز تەك اتا-اناسى جازباشا ءوتىنىش بەرگەن جاعدايدا عانا تاسىمالداۋعا قابىلدايدى، - دەيدى ماماندار.
الايدا 6 جاستان اسقان بالالار تاۋلىكتىڭ تۇنگى ۋاقىتىندا جالعىز ۇشا المايدى.
- «قازاقستان رەسپۋبليكاسىنداعى بالانىڭ قۇقىقتارى تۋرالى» زاڭنىڭ 36-بابىنىڭ 5-تارماعىنا سايكەس، ەرەسەك ادامسىز جول جۇرەتىن كامەلەتكە تولماعان بالالار تۇنگى ساعات 23:00-دەن تاڭعى 06:00-گە دەيىنگى ۋاقىتتا ۇشاققا وتىرعىزىلمايدى، - دەيدى قازاقستان رەسپۋبليكاسى كولىك مينيسترلىگى.
اۆتور
ارۋجان ماحمۋت
