ەلىمىزدە 1991 -جىلدان باستاپ بەرىلگەن ج و و ديپلومدارى ەلەكتروندى بازاعا ەنگىزىلىپ جاتىر

Диплом
Фото: Kazinform

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ەلىمىزدەگى جالعان ديپلومداردى انىقتاۋدىڭ تەتىگى ىسكە قوسىلىپ جاتقانىن ايتتى.

«جالعان ديپلوم جاساۋ - قىلمىستىق ارەكەت. ديپلوم مەن قۇجاتتاردىڭ جالعان ەكەنىن بىلە تۇرا ساتىپ العاندار دا جاۋاپقا تارتىلادى. قازىر ىشكى ىستەر مينيسترلىگىمەن جانە باسقا دا قۇقىق قورعاۋ ورگاندارىمەن بىرلەسە ءتيىستى جوسپارىمىزدى بەكىتتىك. جارناما تارايتىن ءتۇرلى پلاتفورمالاردا جالعان قۇجاتتاردىڭ ساتىلىمىن انىقتاۋعا رەيد ءجۇرىپ جاتىر. اتاپ ايتقاندا، زاڭ بۇزعانداردى جازالاۋ كەرەك»، - دەدى س.نۇربەك پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، 1991-جىلدان باستاپ بەرىلگەن ديپلومدار تۋرالى مالىمەتتەر جيناقتالىپ جاتىر.

«ارنايى پلاتفورمادا 1991-جىلدان باستاپ بەرىلگەن بۇكىل ديپلومدى ەنگىزىپ جاتىرمىز. بۇل جۇمىستار 2018 -جىلدان باستالعان ەدى. وسى ۋاقىت ارالىعىندا 3,5 ميلليون ديپلوم بازادا بار. ەندى كەز كەلگەن جۇمىس بەرۋشى ارنايى سيفرلىق قىزمەت ارقىلى تەكسەرە الادى. ءار ديپلومنىڭ جەكە ءنومىرى مەن QR- كودى بەكىتىلەدى. بۇل تۇرعىدا جالعان ديپلومدى انىقتاۋ مۇمكىن بولادى»، - دەدى مينيستر.

اۆتور

رۋسلان عابباسوۆ

سوڭعى جاڭالىقتار