ەلىمىزدە 1,8 ميلليون ادامنىڭ جالاقىسى ءوستى
مەملەكەت باسشىسىنىڭ تاپسىرماسىن ىسكە اسىرۋ ماقساتىندا بۇگىننەن باستاپ ەلىمىزدە ەڭ تومەن جالاقى مولشەرى 70000 تەڭگەدەن 85000 تەڭگەگە دەيىن ۇلعايدى، دەپ حابارلايدى Kazinform.
ەڭبەك كودەكسىنە سايكەس جۇمىس بەرۋشىلەر جۇمىسكەرلەرگە ەڭبەكاقىنى ەڭ تومەن جالاقىدان تومەن بولمايتىن دەڭگەيدە قامتاماسىز ەتۋگە مىندەتتى.
وسىعان وراي 85 مىڭ تەڭگەگە دەيىن جالاقى الاتىن ءتۇرلى مەنشىك نىسانىنداعى كاسىپورىنداردىڭ بارلىق سالاسىندا جۇمىس ىستەيتىن 1,8 ميلليونعا جۋىق جالدامالى جۇمىسكەردىڭ، ونىڭ ىشىندە بيۋجەت سالاسىنداعى 350 مىڭ قىزمەتكەردىڭ اقشالاي كىرىسى وسەدى.
ءبىرىنشى كەزەكتە ەڭ تومەن جالاقىنى ارتتىرۋ «ايلىعى از» قىزمەتكەرلەرگە قاتىستى بولادى.
ەكىنشىدەن، جالاقى دەڭگەيىن بەلگىلەۋ كەزىندە ەڭ تومەن جالاقى كورسەتكىشىن پايدالاناتىن جۇمىس بەرۋشىلەر رازريادارالىق بىلىكتىلىك جۇيەسىن ەسكەرە وتىرىپ، قىزمەتكەرلەردىڭ باسقا ساناتتارىنىڭ جالاقىسىن قايتا قارايدى.
ەستەرىڭىزگە سالا كەتەيىك، ەڭ تومەن جالاقى ەڭبەك سالاسىنداعى ەڭ تومەن الەۋمەتتىك ستاندارت سانالادى جانە جىل سايىن ءتيىستى قارجى جىلىنا سايكەس رەسپۋبليكالىق بيۋجەت تۋرالى زاڭمەن بەلگىلەنەدى.
