ەلىمىزگە تىكەلەي شەتەلدىك ينۆەستيتسيالار تارتۋ تومەندەدى مە

استانا. KAZINFORM – ق ر ۇلتتىق ەكونوميكا مينيسترلىگى ەلىمىزگە تىكەلەي شەتەلدىك ينۆەستيتسيالار تارتۋ ماسەلەسى بويىنشا Kazinform اگەنتتىگىنىڭ رەسمي سۇراۋىنا جاۋاپ بەردى.

- جاھاندىق نارىقتاعى بەلگىسىزدىك پەن جەتەكشى ەكونوميكاداعى وندىرىستىك جانە ينۆەستيتسيالىق بەلسەندىلىكتىڭ تومەندەۋى اياسىندا ۇكىمەت ينۆەستيتسيالىق احۋالدى جاقسارتۋ باعىتىندا ناقتى شارالار قابىلداپ جاتىر. سونىمەن قاتار رەتتەۋشى ساياساتتى جەتىلدىرۋ، اكىمشىلىك كەدەرگىلەردى جويۋ جانە ەكونوميكانىڭ نەگىزگى سالالارىندا كاپيتال تارتۋ ءۇشىن قولايلى جاعداي جاساۋ بويىنشا جۇيەلى جۇمىس جۇرگىزىلىپ جاتىر، - دەپ مالىمدەدى مينيسترلىك.

ۆەدومستۆانىڭ اقپاراتىنا سايكەس، قازىرگى تاڭدا ينۆەستيتسيالىق شتاب شەڭبەرىندە ەلدىڭ ينۆەستيتسيالىق الەۋەتىن ارتتىرۋعا كەدەرگى كەلتىرىپ وتىرعان توسقاۋىلداردى جويۋ جانە جاڭا مۇمكىندىكتەر اشۋ باعىتىندا بەلسەندى جۇمىس اتقارىلىپ جاتىر.

- ترانس قازاقستاندىق تەمىرجول ءدالىزىن جاڭعىرتۋ، ماگيسترالدىق جەلىلەردىڭ وتكىزۋ قابىلەتىن ارتتىرۋ بويىنشا ناقتى ۇسىنىستار قاراستىرىلۋدا. بۇل باستامالار ەلىمىزدىڭ كولىك-لوگيستيكالىق الەۋەتىن ارتتىرىپ، ينۆەستيتسيا تارتۋ ماسەلەسىنە سەرپىن بەرەدى، - دەلىنگەن جاۋاپتا.

رەسمي مالىمەت بويىنشا، 2024-جىلى قازاقستانعا تارتىلعان تىكەلەي شەتەلدىك ينۆەستيتسيالار كولەمى 17,2 ميلليارد ا ق ش دوللارىن قۇرادى، ونىڭ ىشىندە 10,7 ميلليارد دوللارى وڭدەۋشى ەمەس سەكتورعا باعىتتالعان.

- بيىل قاڭتار-مامىر ايلارىندا نەگىزگى كاپيتالعا سالىنعان ينۆەستيتسيالار كولەمى 5952,4 ميلليارد تەڭگەگە جەتىپ، وتكەن جىلدىڭ سايكەس كەزەڭىمەن سالىستىرعاندا 18,2 پايىزعا ارتتى. ال تىكەلەي ينۆەستيتسيالار بويىنشا 2025-جىلدىڭ ءبىرىنشى توقسانى بويىنشا دەرەكتەر 30-ماۋسىمدا ۇلتتىق بانكتىڭ سايتىندا جاريالانادى، - دەپ ناقتىلادى مينيستىرلىك.

وسى ماسەلەگە قاتىستى KAZINFORM ءتىلشىسى ساراپشى راسۋل رىسمامبەتوۆتەن سۇحبات الىپ، جاعدايدىڭ ءمان-جايىن ناقتىلاۋعا تىرىستى.

- قازاقستان تەڭىزگە شىعا المايتىن ەلدەر قاتارىندا. سوندىقتان لوگيستيكا مەن ترانزيت بىزگە اۋاداي قاجەت. وسى باعىتتى مەملەكەت ءوزى دامىتۋى كەرەك، - دەيدى ول.

ساراپشىنىڭ ايتۋىنشا، قازىرگى كەزەڭدە ەڭ باستى باسىمدىق - ەكسپورتتىق باعىتتاردى كۇشەيتۋ.

- پرەزيدەنت تە ايتتى عوي جاقىندا - تەمىرجولداردىڭ مىڭداعان شاقىرىمى جاڭادان سالىنادى. بۇل - ءبىزدىڭ تاۋاردى سىرتقا شىعارۋدىڭ جولى. بىزگە قازىر جۇمىس ىستەيتىن لوگيستيكالىق مارشرۋتتار قاجەت، - دەدى رىسمامبەتوۆ.

سونىمەن قاتار سالىقتىق جانە رەتتەۋشى ىنتالاندىرۋلارعا قاتىستى ساراپشى بىلاي دەپ پىكىر ءبىلدىردى.

- قاي سالاعا ينۆەستيتسيا تارتقىمىز كەلەدى - سونى ناقتىلاپ الۋىمىز كەرەك. مىسالى، اۋىل شارۋاشىلىعى ماڭىزدى سالا، ءبىراق شەتەلدىكتەرگە جەر ساتۋعا تىيىم بار. بۇل - ورىندى شەكتەۋ. دەگەنمەن، ەگەر سىرتتان تەحنولوگيا كەلەتىن بولسا، بەلگىلى ءبىر مەحانيزمدەر قاجەت. ال وعان دەيىن ينفراقۇرىلىم مەن لوگيستيكانى تۇزەپ الۋ كەرەك، - دەدى ول.

سونداي-اق تاۋ-كەن مەتاللۋرگيا كەشەنى تۋرالى دا ءوز ويىن ايتتى.

- ءبىز شيكىزاتتى ەكسپورتتاۋدا تاجىريبەلىمىز. ءبىراق ەندى ەڭ باستىسى - دايىن ءونىم ءوندىرۋ. قازىر شەتەلدىك ينۆەستورلار قايتا وڭدەۋگە اسىقپاي وتىر. سوندىقتان مەملەكەت ءبىرىنشى ءوزى باستاماشى بولۋى ءتيىس. سوندا عانا سەنىمدى سەرىكتەستىك ورنايدى، - دەپ تۇيىندەدى راسۋل رىسمامبەتوۆ.

ەسكە سالا كەتەيىك، پرەمەر-مينيستر ولجاس بەكتەنوۆ شەتەلدىك ينۆەستورلار كەڭەسى قاتىسۋشىلارىمەن كەزدەسۋ بارىسىندا پرەزيدەنت بەلگىلەگەن ينۆەستيتسيالىق ىنتىماقتاستىقتىڭ كەلەشەگى زور باعىتتارىن تالقىلاعان بولاتىن.