ەلىمىزگە قىتايدان 655 مىڭ تۋريست كەلدى
استانا. قازاقپارات - 2024 -جىلى ەلىمىزگە قىتايدان 655 مىڭ تۋريست كەلدى. بۇل تۋرالى ورتالىق كوممۋنيكاتسيالار قىزمەتىندەگى بريفينگىدە تۋريزم جانە سپورت مينيسترلىگى تۋريزم يندۋسترياسى كوميتەتىنىڭ ءتوراعاسى نۇرتاس كارىپبايەۆ ايتتى.
- قازاقستانعا كەلگەن قىتايلىقتار سانى ايتارلىقتاي ءوستى. 2024 -جىلى قىتايدان كەلگەن تۋريستەر لەگى 655 مىڭ ادامدى قۇرادى. بۇل 2023 -جىلمەن سالىستىرعاندا 78 پايىزعا كوپ. كورسەتكىش قىتاي ازاماتتارىنىڭ مادەني جانە تابيعي مۇرامىزعا دەگەن قىزىعۋشىلىعىنىڭ ارتىپ كەلە جاتقانىن كورسەتەدى. سونىمەن قاتار تۋريزم جىلى اياسىندا وڭىرلەر، تۋركومپانيالار، اگەنتتىكتەر مەن مەديا پلاتفورمالار اراسىندا 200-دەن استام كەلىسىمگە قول قويىلدى. بۇل ءوزارا ءىس-قيمىلعا بەرىك نەگىز بولدى، - دەدى ول.
كوميتەت ءتوراعاسىنىڭ ايتۋىنشا، ءىس-شارالار اقپاراتتىق الاڭدا دا كەڭىنەن كورىنىس تاپتى. 1,3 ميللياردتان استام اۋديتورياسى بار قىتايلىق ءىرى مەديا مەن الەۋمەتتىك جەلىلەردە قازاقستان تۋرالى حابار تاراتتى. بۇل ەلىمىزدىڭ تۋريستىك باعىت رەتىندە تانىلۋىن ايتارلىقتاي ارتتىرۋعا مۇمكىندىك بەردى.
- رەسمي تۇردە 2025 -جىل قىتايدىڭ قازاقستانداعى تۋريزم جىلى بولىپ جاريالانعانىن اتاپ ءوتۋ كەرەك. بۇل ەكىجاقتى قارىم-قاتىناستاردىڭ تەرەڭدەي تۇسكەنىن كورسەتەدى. ءارى بۇل ەكى تاراپقا ىنتىماقتاستىقتى ودان ءارى نىعايتۋدا جاڭا مۇمكىندىكتەر بەرەدى. وسىنىڭ ءبارى ءتۋريزمنىڭ دامۋىنا ىقپال ەتىپ قانا قويماي، حالىقتار اراسىنداعى مادەني جانە ەكونوميكالىق بايلانىستاردى نىعايتۋعا ماڭىزدى ۇلەس قوسادى، - دەدى نۇرتاس كارىپبايەۆ.
ايتا كەتەيىك، «قىتايداعى قازاقستان تۋريزمى جىلىنىڭ» رەسمي اشىلۋى بەيجىڭ قالاسىندا 2023 -جىلدىڭ 28-29 -ناۋرىزىندا ءوتتى. وندا ەكى ەل اراسىنداعى تۋريستىك جانە مادەني بايلانىستاردى دامىتۋ، تۋريستىك سالاعا ينۆەستيتسيا تارتۋ جوسپارلارى تالقىلاندى.
رەسمي اشىلۋ سالتاناتى قىتاي ۇلتتىق وپەرا ۇيىندە ۇيىمداستىرىلدى. ءىس-شاراعا 500-دەن استام قوناق قاتىستى. قىتايدىڭ 30-دان استام ورتالىق مەدياسى جان-جاقتى حابار تاراتتى. ال تۋريزم جىلىنىڭ رەسمي جابىلۋى 2024 -جىلى 27 -قاراشادا الماتى قالاسىندا بولدى. قازاقستاننىڭ قىتايداعى تۋريزم جىلىنىڭ قورىتىندىسىنا ارنالعان حالىقارالىق فورۋم ۇيىمداستىرىلدى. وعان ەكى ەلدىڭ تۋريستىك يندۋسترياسىنىڭ 300-دەن استام وكىلى قاتىستى.
بۇعان دەيىن قىتايداعى قازاقستان تۋريزمى جىلى ىشكى تۋريزمگە قانداي سەرپىن بەرگەنىن جازعان ەدىك.
اۆتور
مارلان جيەمباي
