ەلىمىز شەشۋشى كەزەڭگە جاقىنداپ قالدى - قاسىم-جومارت توقايەۆ
استانا. KAZINORM - ەلىمىز وتە ماڭىزدى، ءتىپتى شەشۋشى كەزەڭگە جاقىنداپ قالدى. بۇل تۋرالى ءماجىلىستىڭ جالپى وتىرىسىندا مەملەكەت باسشىسى قاسىم-جومارت توقايەۆ ايتتى.
«ەڭ الدىمەن بارشاڭىزعا ريزاشىلىعىمدى، راقمەتىمدى ايتقىم كەلەدى. سىزدەر جوعارى ساياسي جانە ازاماتتىق جاۋاپكەرشىلىكتى كورسەتتىڭىزدەر. راسىندا ەلىمىز وتە ماڭىزدى، ءتىپتى شەشۋشى كەزەڭگە جاقىنداپ قالدى. ماسەلەن، «تاياۋ كەلەشەكتە قازاقستان قانداي مەملەكەت بولادى، ونىڭ ايماقتىق جانە الەمدىك قوعامداستىقتا اتقاراتىن ءرولى قانداي بولماق؟» دەگەن اسا ماڭىزدى سۇراقتار تۇر. قازىرگى باسەكەگە تولى، ءتۇرلى جانجالعا ۇشىراعان تۇراقسىز، بۇلىڭعىر الەمدە قازاقستان كۇشتى، بولاشاعىنا سەنىممەن قارايتىن ەل بولۋى كەرەك. ونىڭ ءبارىن قامتاماسىز ەتۋ - ءبارىمىزدىڭ ورتاق مىندەتىمىز، پارىزىمىز دەپ ايتۋعا بولادى. بۇل ماسەلە بويىنشا ۇكىمەتتىڭ اتقاراتىن ءرولى ەرەكشە»، - دەپ اتاپ ءوتتى قاسىم-جومارت توقايەۆ.
وسى ورايدا پرەزيدەنت جاڭا تاعايىندالعان پرەمەر-مينيستر ولجاس اباي ۇلى بەكتەنوۆتى جاڭا لاۋازىمىمەن قۇتتىقتاپ، جۇمىسىنا تابىس تىلەدى.
«مەن پرەزيدەنت رەتىندە دەپۋتاتتاردىڭ جۇمىسىن مۇقيات قاداعالاپ وتىرمىن. شىندىقتى ايتامىن، ماجىلىسكە ريزامىن. شىن مانىندە اۋقىمدى، ماڭىزدى جۇمىستى، ەڭ الدىمەن حالىق ءۇشىن قاجەتتى جۇمىستى ابىرويمەن اتقارىپ وتىرسىزدار. سوندىقتان بارشاڭىزعا ريزاشىلىعىمدى بىلدىرەمىن»، - دەدى مەملەكەت باسشىسى.
