ەلىمىز دارىلىك زاتتاردىڭ يمپورتىنا باتىپ بارادى - دەپۋتات
استانا. KAZINFORM - دارىلىك زاتتار مەن مەديتسينالىق زاتتاردىڭ وتاندىق ءوندىرىسىنىڭ ۇلەسىن 50 پايىزعا جەتكىزۋ مىندەتى ورىندالماۋى مۇمكىن. بۇل تۋرالى پارلامەنت ءماجىلىسىنىڭ جالپى وتىرىسىندا دەپۋتات اسحات ايماعامبەتوۆ ايتتى.
- وتاندىق فارم ءوندىرىس جانە عىلىمعا توقتالساق، ميللياردتار يلليۋزياعا كەتىپ جاتقان جوق پا؟ مەملەكەت باسشىسى 2025 -جىلعا قاراي دارىلىك زاتتار مەن مەديتسينالىق بۇيىمداردىڭ وتاندىق ءوندىرىسىنىڭ ۇلەسىن 50 پايىزعا دەيىن جەتكىزۋ مىندەتىن قويدى. 2024 -جىلى ول تەك 15 پايىزدى قۇرادى. ءبىز يمپورت تەڭىزىنە باتىپ بارامىز. دارىلەردىڭ 84 پايىزىن شەتەلدەن اكەلەمىز. 89 وتاندىق ءوندىرۋشىنىڭ تەك 2 پايىزى ءدارى شىعارادى، ال قالعاندارى ماسكا نەمەسە شپريتس سياقتى مەديتسينالىق زاتتاردى وندىرەدى ەكەن. وسىنداي جۇمىسپەن، جىل سوڭىنا قاراي قويىلعان ماقساتقا جەتۋ مۇمكىن ەمەس، - دەدى ا. ايماعامبەتوۆ پالاتا وتىرىسىندا ءدارى-دارمەكپەن قامتاماسىز ەتۋ جۇيەسىنە جۇرگىزىلگەن مەملەكەتتىك اۋديت ناتيجەسىن تالقىلاۋ كەزىندە.
ونىڭ ايتۋىنشا، وتاندىق وندىرۋشىلەردى قولداۋعا قوماقتى اقشا جۇمسالىپ جاتىر. بۇل ميللياردتاعان سۋبسيديالار، جەڭىلدىكپەن نەسيە بەرۋ، كەدەندىك پرەفەرەنسيالار، سالىقتان بوساتۋ، سونداي-اق ۇزاق مەرزىمدىك تۇتىنۋ تۋرالى شارتتار قامتىلعان.
- وسىنداي قولداۋ كورسەتە وتىرىپ، ءبىز قانداي پايدا كورىپ وتىرمىز؟ وعان قوسا، بۇل ونىمدەردە وتاندىق ەكونوميكا ۇلەسى دە از، قاعاز دا، شىنى دا كوبىنەسە سىرتتان كەلەدى دەگەن اقپارات بار. سوندا ميللياردتاردتاعان سۋبسيديالار مەن قولداۋىمىز جاساندى، يلليۋزيالىق وندىرىسكە كەتىپ جاتقان جوق پا؟ ءالى كۇنگە دەيىن لوكاليزاتسيا دەڭگەيى بەلگىسىز، قانداي سۋبستانسيا شەكارا ارقىلى كىرىپ جاتقانى دا بىزگە تۇسىنىكسىز. ينۆەستيتسيالىق كەلىسىمشارتتار بويىنشا دا سۇراق كوپ. ولاردى بەلگىلى ءبىر ۋاقىت وتكەن سايىن جاڭارتىپ، ينۆەستورلاردىڭ مىندەتتەمەلەرىن ناقتى كورسەتۋ كەرەك، - دەدى دەپۋتات.
بۇدان بۇرىن حابارلانعانداي، ق ر جوعارى اۋديتورلىق پالاتاسىنىڭ ءتوراعاسى ءاليحان سمايىلوۆ قازاقستاندا ازاماتتاردى ءدارى-دارمەكپەن قامتاماسىز ەتۋ جۇيەسىنە جۇرگىزىلگەن مەملەكەتتىك اۋديت ناتيجەسىن جاريالادى.
اۆتور
رۋسلان عابباسوۆ
