ەلىمىزگە ەڭبەك ميگرانتتارى نەگىزىنەن قاي ەلدەردەن كەلەدى

استانا. قازاقپارات - 2024 -جىلعى 1-جەلتوقسانداعى جاعداي بويىنشا جەرگىلىكتى اتقارۋشى ورگانداردىڭ رۇقساتىمەن ەل اۋماعىندا 13743 شەتەل ازاماتى ەڭبەك ەتەدى. 

- شەتەل جۇمىس كۇشىن تارتۋعا رۇقساتتاردىڭ اراسىندا مىناداي ساناتتار بار: باسشىلار مەن ولاردىڭ ورىنباسارلارى ءۇشىن 564 رۇقسات (ءبىرىنشى سانات)، قۇرىلىمدىق بولىمشەلەردىڭ باسشىلارى ءۇشىن 2585 رۇقسات (ەكىنشى سانات). تارتىلعان ش ج ك نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى - تيىسىنشە ولار 4913 جانە 999 ادام. سونداي-اق ماۋسىمدىق جۇمىستارعا 1186 ادام، ال كورپوراتيۆتىك اۋىستىرۋ اياسىندا 3496 ادام تارتىلدى، - دەلىنگەن ەڭبەك جانە حالىقتى الەۋمەتتىك قورعاۋ مينيسترلىگى تاراتقان حابارلامادا.

قازىرگى ۋاقىتتا ەلدە ش ج ك پايدالاناتىن 1744 جۇمىس بەرۋشى بار. ولاردا 388 مىڭنان استام قازاقستان ازاماتى جۇمىس ىستەيدى، بۇل قىزمەتكەرلەردىڭ جالپى سانىنىڭ %96,5 ى.

ەكونوميكالىق قىزمەت تۇرلەرى بويىنشا ەڭ كوپ جۇمىس ىستەيتىندەر قۇرىلىس سالاسىندا - 5390 ادام، وڭدەۋ ونەركاسىبى - 1455 ادام، تاۋ - كەن ونەركاسىبى جانە كارەرلەردى قازۋ - 1355 ادام، اكىمشىلىك جانە كومەكشى قىزمەتتەر - 1305 ادام، اۋىل، ورمان جانە بالىق شارۋاشىلىعى - 1237 ادام.

ەڭبەك ميگرانتتارى كەلەتىن نەگىزگى ەلدەر: قىتاي - 4881 ادام، وزبەكستان - 1273 ادام، تۇركيا - 1203 ادام، ءۇندىستان - 1095 ادام.

ىشكى ەڭبەك نارىعىن قورعاۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى جىل سايىن رەسپۋبليكاعا شەتەل ماماندارىن تارتۋعا كۆوتا بەلگىلەيدى جانە بولەدى. 2024 -جىلى جالپى كۆوتا رەسپۋبليكاداعى جۇمىس كۇشىنىڭ سانىنا قاتىستى %0,23 نەمەسە 22 مىڭ مولشەرىندە بەلگىلەندى، وسى جىلى قاراشادان باستاپ ءمينيستردىڭ بۇيرىعىمەن 17,2 مىڭعا دەيىن قىسقارتىلدى.

ەسكە سالساق، ەلدە 350 مىڭنان استام ەڭبەك ميگرانتى تىركەلگەنى تۋرالى جازعان بولاتىنبىز.

اۆتور

گۇلنۇر عازيز قىزى