ەلىمىزگە 1991-جىلدان بەرى ميلليوننان استام قانداس ورالدى

استانا. قازاقپارات – تاۋەلسىزدىك العاننان بەرى ميلليوننان استام قازاق تاريحي وتانىنا ورالدى، دەپ حابارلايدى 24kz.

ال جىل باسىنان بەرى 7 مىڭنان اسا ادام قانداس مارتەبەسىنە يە بولدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىندە حابارلادى. بيىل كەلگەندەردىڭ باسىم بولىگى - قىتاي مەن وزبەكستاننان قونىس اۋدارعاندار. ال شامامەن 15 پايىزى بۇعان دەيىن تۇركىمەنستان مەن موڭعوليادا ءومىر سۇرگەن.

بيىل قانداستار ارنايى كۆوتامەن بولىنگەن وڭىرلەرگە قونىستاندىرىلدى. بارلىعى 2433 ادام بىرنەشە وبلىسقا قازىعىن قاقتى. قانداستاردى ەڭبەك كۇشى تاپشىلىق ەتەتىن اباي، اقمولا، قوستاناي، پاۆلودار، شىعىس قازاقستان جانە سولتۇستىك قازاقستان وبلىستارى قابىلدادى. جوعارىدا كورسەتىلگەن وڭىرلەرگە كوشىپ بارعان قانداستارعا سۋبسيديا تۇرىندە مەملەكەتتىك قولداۋ شارالارى كورسەتىلەدى. وتباسىنىڭ ءار مۇشەسىنە كوشۋى ءۇشىن 260 مىڭ تەڭگە تولەنەدى. باسپانا جالداۋعا جانە كوممۋنالدىق شىعىندارعا ءبىر جىل بويى ءار اي سايىن 15-تەن 30 ا ە ك- كە دەيىن تولەنەدى.