ليفتتە شابۋىل جاسالعان بالاعا پسيحولوگيالىق كومەك كورسەتىلىپ جاتىر - دارىگەر

استانا. KAZINFORM - بالانىڭ ومىرىنە ەش قاۋىپ ءتونىپ تۇرعان جوق، ونىمەن پسيحولوگ جۇمىس ىستەۋدى باستادى، دەپ حابارلايدى Kazinform اگەنتتىگىنىڭ ءتىلشىسى.

ەلوردالىق №2 كوپسالالى بالالار اۋرۋحاناسى ديرەكتورىنىڭ ورىنباسارى مەدەت نۇعمانوۆتىڭ ايتۋىنشا، كەشە تۇستەن كەيىن اۋرۋحانانىڭ جاراقات پۋنكتىنە 5 جاسار بالا جەدەل جاردەم بريگاداسىمەن جەتكىزىلگەن. ونى كەزەكشى تراۆماتولوگ پەن جاق-بەت حيرۋرگى قاراعان.

- بالانىڭ بەتىندە، قۇلاق ماڭى مەن سامايىندا 4 جاراقات بولدى، سۋىق قارۋ مويىنىنا جەتپەگەن. وقيعا ورنىندا العاشقى كومەك وتە ساپالى جۇرگىزىلگەن، ايتپەسە بالا كوپ قان جوعالتىپ، اسقىنۋلار بولۋى مۇمكىن ەدى. ءبىزدىڭ دارىگەرلەر جاراقاتتاردان اققان قاندى توقتاتتى، تامىرلاردى تىكتى، جالپى وپەراتسيا 1 ساعاتقا سوزىلدى. بالا ناركوزبەن ۇيىقتادى، ءبىر ساعاتتاي جانساقتاۋ بولىمىندە جاتتى، ويانعان سوڭ بولىمشەگە اۋىستىرىلدى. قازىر دە پاتسيەنت تولىققاندى ەم الىپ جاتىر، جاراقات 5-10 كۇندە جازىلادى، ءبارى بالانىڭ اعزاسىنا بايلانىستى، - م. نۇعمانوۆ تىلشىلەرگە بەرگەن سۇحباتىندا.

سونداي-اق، اۋرۋحانا پسيحولوگتارى زارداپ شەككەن بالامەن جۇمىس ىستەۋدى باستادى.

- ارينە، جاراقاتتان كەيىن تىرتىق قالادى، ونى ۋاقىت كورسەتەدى، وسە كەلە تىرتىق بايقالماۋى دا مۇمكىن. قازىر بالانىڭ جاعدايى تۇراقتى، ەش اسقىنۋ جوق، ومىرىنە ەش قاۋىپ تۇرعان جوق، - دەپ تۇيىندەدى دارىگەر.

ايتا كەتەيىك، كەشە ەلورداداعى تۇرعىن ۇيلەردىڭ ءبىرىنىڭ ليفتىندە بەلگىسىز جاس ءوسپىرىمنىڭ كىشكەنتاي بالاعا پىشاقپەن شابۋىل جاساعانى تۋرالى اقپارات تارادى.

شابۋىل جاساعان جاس ءوسپىرىم ارنايى پسيحونيەۆرولوگيالىق ەسەپتە تۇرعان.

اۆتور

ايجان سەرىكجان قىزى