ۇلى تۇلعالارعا ءتىل تيگىزۋگە جول بەرمەيتىن شارالاردى كۇشەيتۋ كەرەك - دەپۋتات
استانا. KAZINFORM - ۇكىمەتتىك دەڭگەيدە جەدەلدەتىپ ۇلتتىق قۇندىلىقتار جۇيەسىنە ارنالعان مەملەكەتتىك باعدارلاما ازىرلەۋ قاجەت. بۇل تۋرالى ءماجىلىستىڭ جالپى وتىرىسىندا دەپۋتات جاناربەك ءاشىمجانوۆ ءمالىم ەتتى.
«سوڭعى كەزدەرى قوعامدا ادام بالاسىنىڭ جاعاسىن ۇستاتاتىن جاعدايلار تولاستاماي تۇر. ار مەن ۇيات بوساعادا قالىپ، وسەك پەن وتىرىك، جادىگويلىك پەن قاتىگەزدىك ۇرپاق ساناسىن ۋلاپ، قوعامدى شىرماپ بارادى. وكىنىشكە قاراي، كەيىنگى كەزدەرى قازاق حالقىنىڭ تاريحىندا وشپەس ءىز قالدىرعان تۇلعالارعا تاس اتىپ، مانسۇقتاپ، باعىتىنان اداسىپ جۇرگەن جاستارىمىزدىڭ قاتارى كوبەيىپ بارادى. جاقىندا الەۋمەتتىك جەلىدە ۇلت ۇستازى - احمەت بايتۇرسىن ۇلىنىڭ سىنىپ بولمەسىندەگى بەينەسىن باس سالىپ توقپاقتاپ، جۇدىرىقتاپ جاتقان وقۋشىنىڭ ارەكەتى جانىمىزدى ءتۇڭىلدىردى. ال كۇنى كەشە ناداندىق پەن توپاستىقتىڭ قيىلىسقان نۇكتەسىنەن ءبۇر جارعان جاس بالا قازاق پوەزياسىنىڭ تاۋتۇلعاسى مۇقاعالي ماقاتايەۆتىڭ ارۋاعىنا ءتىل تيگىزىپ، ەلدىڭ ەسىن ەكەۋ، ءتۇسىن تورتەۋ قىلدى. بۇل كەلەڭسىز وقيعا بۇكىل قوعامنىڭ جانىن تۇرشىكتىردى»، - دەدى ج. ءاشىمجانوۆ پرەمەر-مينيستر مەن باس پروكۋروردىڭ اتىنا جولداعان ساۋالىندا.
ونىڭ ايتۋىنشا، ءتيىستى قۇزىرلى ورىندار مەن جاۋاپتى مەملەكەتتىك ورگاندار تاراپىنان مۇنداي قادامدارعا ءتيىستى قۇقىقتىق باعاسى ۋاقىتىلى بەرىلمەگەن جەردە، ءتۇرلى الەۋمەتتىك توپتار ءوز بەتىنشە جازالاۋ شاراسىنا كوشەدى.
«الەۋمەتتىك جەلىلەردە تاريحي تۇلعالارعا عانا ەمەس، ءتىل مەن دىنگە، ۇلتتىڭ نامىسىنا، ءتۇرلى ادىلەتسىزدىكتەرگە بايلانىستى ءوز بەتىمەن «جازالاۋ» شارالارى از ەمەس. مۇقاعاليعا قاتىستى جاعدايدا دا اشۋعا بۋلىعىپ، شاراسىزدىققا ۇشىراعان ازاماتتار سونداي قادامعا باردى. جەكە اككاۋنتىندا ادام جيناپ اتاققا شىعام دەگەن بالانى اكە- شەشەسىمەن اقىننىڭ تۋعان جەرىنە الىپ بارىپ، كەشىرىم سۇراتتى. جانۇشىرعان قارت كىسىنىڭ تاۋ باۋرايىن جاڭعىرتقان جانايقايىنىڭ ءتۇپ تامىرى قايدا جاتىر؟ نامىستان جارىلا جازداعان جۇرتتىڭ بۇل قادامىن قوعام ءارتۇرلى قابىلدادى، ارينە. الايدا، رۋحاني تۇرعىدا كەز كەلگەن كەرى ارەكەتكە ءتيىستى ۋاكىلەتتى ورگاندار تاراپىنان جاۋاپ بەرىلمەگەن جەردە وسىنداي جاعدايلار ورىن الادى. ەل پرەزيدەنتىنىڭ ءسات سايىن «قوعامدا زاڭ ۇستەمدىگى جانە ءتارتىپ سالتانات قۇرۋ كەرەك!» دەگەن ءسوزىنىڭ ءتۇپ ماعىناسى وسى ەمەس پە، اعايىن!»، - دەدى دەپۋتات.
ونىڭ پايىمىنشا، قوعامدا رۋحاني تۇرعىدان ازعىنداعان توبىرلىق مادەنيەت قاتتى بەلەڭ الىپ بارادى. مۇنىڭ باستى سەبەبى - پاتريوتتىق سانا مەن ۇلتتىق تاربيەدە، وتباسىلىق قۇندىلىقتا كەتىپ جاتقان كەسەل- كەمشىلىكتەر. سوسىن ناۋقانشىلدىق پەن جالعان جاسامپازدىقتىڭ، مەملەكەت قازىناسىن جەلگە ۇشىرىپ جاتقان جەمقورلىقتىڭ كەسىرى.
«ەلدىڭ ەرتەڭىن سەنىپ تاپسىراتىن ۇرپاق قالىپتاستىرامىز دەسەك، ۇكىمەتتىك دەڭگەيدە جەدەلدەتىپ ۇلتتىق قۇندىلىقتار جۇيەسىنە ارنالعان مەملەكەتتىك باعدارلاما ازىرلەۋ قاجەت. بالاباقشالاردا، مەكتەپتەردە، وقۋ-اعارتۋ باعىتىندا بۇلجىماس ۇلتتىق تاربيە مەن پاتريوتتىق ءىس-قيمىل شارالارى جۇزەگە اسىرىلۋى ءتيىس. ۇكىمەت ۇلتىمىزدىڭ ۇلى تۇلعالارىنا ءتىل تيگىزۋگە، قورلاۋعا جول بەرمەيتىن شارالاردى زاڭدىق تۇرعىدان قولعا الۋى كەرەك دەپ سانايمىز. ەل ماقتانىشتارىنىڭ ار- نامىسىن اياققا تاپتاعاندار زاڭ الدىندا جاۋاپ بەرىپ، ءتيىستى جازاسىن العان جاعدايدا عانا ۇلتتىق قۇندىلىقتارىمىزدى قاستەرلەي الامىز»، - دەدى جاناربەك ءاشىمجانوۆ.
اۆتور
رۋسلان عابباسوۆ
