لي جە ميەن وڭتۇستىك كورەيا پرەزيدەنتى رەتىندە رەسمي تۇردە قىزمەتىنە كىرىستى
استانا. KAZINFORM - لي جە ميەن سارسەنبى كۇنى وڭتۇستىك كورەيا پرەزيدەنتى لاۋازىمىنا رەسمي تۇردە كىرىستى، دەپ حابارلايدى Yonhap.
ول ەكونوميكاعا جان بىتىرۋگە جانە ۇلتتىق مۇددەگە نەگىزدەلگەن پراگماتيكالىق سىرتقى ساياسات جۇرگىزۋگە ۋادە بەردى.
ءول وزىنىڭ بەس جىلدىق مەرزىمىن اۋىسۋ كەزەڭىنسىز باستادى. بۇل مەرزىم بۇرىنعى پرەزيدەنت يۋن سوك يەلگە يمپيچمەنت جاريالانىپ، ول بيلىكتەن شەتتەتىلگەننەن كەيىن وتكەن كەزەكتەن تىس سايلاۋداعى جەڭىسىنىڭ ناتيجەسى بولدى.
لي جە ميەن ەلدى يۋن سوك يەلدىڭ اسكەري توتەنشە جاعداي ەنگىزۋگە تىرىسۋى، وعان قاتىستى يمپيچمەنت جانە كەيىنگى بيلىكتەن الاستاتىلۋى سالدارىنان تۋىنداعان ساياسي بولىنۋدەن كەيىن بىرىكتىرۋگە ۋادە بەردى.
- ساياسي كۇرەستىڭ قۇرالىنا اينالعان قاۋىپسىزدىك پەن بەيبىتشىلىكتى قالپىنا كەلتىرەتىن ۋاقىت كەلدى؛ نەمقۇرايدىلىق، بىلىكسىزدىك جانە جاۋاپسىزدىق كەسىرىنەن زارداپ شەككەن كۇنكورىس پەن ەكونوميكانى قالپىنا كەلتىرەتىن كەز كەلدى؛ تانكتەر مەن اۆتوماتتارمەن تاپتالعان دەموكراتيانى قايتا جانداندىراتىن شاق تۋدى، - دەدى ول.
ەكونوميكا سالاسىندا لي ءوسىمدى ىنتالاندىرۋ جانە جاساندى ينتەللەكت پەن جارتىلاي وتكىزگىشتەر سياقتى وزىق تەحنولوگيالاردى دامىتۋ ءۇشىن «پراگماتيكالىق ءارى نارىققا باعىتتالعان» ءتاسىلدى ۇستاناتىنىن ايتتى.
ال سىرتقى ساياساتتا لي ۇلتتىق مۇددەگە نەگىزدەلگەن «پراگماتيكالىق» ديپلوماتيانىڭ ماڭىزدىلىعىن اتاپ ءوتتى.
- ءبىز مىزعىماس كورەي- امەريكالىق وداق نەگىزىندە وڭتۇستىك كورەيا، ا ق ش جانە جاپونيا اراسىنداعى ىنتىماقتاستىقتى نىعايتامىز جانە كورشىلەس ەلدەرمەن قارىم-قاتىناستى پراگماتيزم مەن ۇلتتىق مۇددەلەرگە سۇيەنە وتىرىپ قالىپتاستىرامىز، - دەدى ول.
سولتۇستىك كورەيا تاراپىنان تونەتىن قاۋىپتەرگە سەنىمدى تۇردە قارسى تۇرۋ قاجەتتىگىن اتاپ وتكەن لي، سونىمەن قاتار پحەنيانمەن ديالوگتى قايتا باستاۋعا دايىن ەكەنىن ءبىلدىردى.
- ءبىز بايلانىس ارنالارىن اشىپ، كورەي تۇبەگىندە بەرىك بەيبىتشىلىك ورناتۋ ءۇشىن سولتۇستىكپەن ديالوگ پەن ىنتىماقتاستىققا ۇمتىلامىز، - دەدى ول.
پرەزيدەنت اكىمشىلىگىنىڭ حابارلاۋىنشا، رەسمي يناۋگۋراتسيا ءراسىمى 17-شىلدەدە، كونستيتۋتسيا كۇنى وتەدى.
ايتا كەتەيىك، وڭتۇستىك كورەيادا وتكەن پرەزيدەنتتىك سايلاۋدا «توبۋرو» دەموكراتيالىق پارتياسىنىڭ اتىنان قاتىسقان لي جە ميەن جەڭىسكە جەتتى.
