لي جە ميەن وڭتۇستىك كورەيا پرەزيدەنتى سايلاۋىندا جەڭىسكە جەتتى: ول كىم
استانا. KAZINFORM - وڭتۇستىك كورەيادا وتكەن پرەزيدەنتتىك سايلاۋدا «توبۋرو» دەموكراتيالىق پارتياسىنىڭ اتىنان قاتىسقان لي جە ميەن جەڭىسكە جەتتى، دەپ جازدى Kazinform اگەنتتىگىنىڭ ءتىلشىسى.
قازىرگى تاڭدا سايلاۋشىلاردىڭ داۋىسى سانالىپ، %100 ناتيجەسى جاريالاندى. لي جە ميەن %49,42 داۋىس جيناسا، قارسىلاسى كيم مۋن سۋ - %41,15 داۋىسقا يە بولدى.
61 جاستاعى لي جە ميەن العاش رەت 2017 -جىلى دەموكراتيالىق پارتيا ىشىندەگى پرايمەريز كەزىندە ەل نازارىنا ىلىككەن ەدى. 2022 -جىلعى پرەزيدەنتتىك سايلاۋدا ول يۋن سوك ەلگە ازداعان ايىرماشىلىقپەن جەڭىلىپ قالعان.
2024 -جىلعى جالپى سايلاۋ بارىسىندا لي قايتا سايلانىپ، دەموكراتيالىق پارتيانى جەڭىسكە جەتكىزدى. وسى ارقىلى ول وپپوزيتسياداعى نەگىزگى كوشباسشى جانە يۋن سوك ەل اكىمشىلىگىنىڭ باستى سىنشىسى رەتىندەگى بەدەلىن كۇشەيتتى، دەپ جازادى Asia Pacific Foundation of Canada.
اتالعان ساراپتامالىق ورتالىقتىڭ مالىمەتىنشە، لي جە ميەننىڭ باعدارلاماسى پراگماتيكالىق سىرتقى ساياساتقا نەگىزدەلگەن. ول سولتۇستىك جانە وڭتۇستىك كورەيا اراسىنداعى سەنىمدى نىعايتۋعا، سونداي-اق قىتاي جانە رەسەيمەن قارىم- قاتىناستى جاقسارتۋعا باسىمدىق بەرەدى. سونىمەن قاتار، ول زىمىرانعا قارسى قورعانىس جانە سوققى بەرۋ قابىلەتتەرىن كۇشەيتۋدىڭ ماڭىزىن مويىندايدى. سوعىس جاعدايىندا وڭتۇستىك كورەياعا بىرىككەن امەريكالىق-كورەيلىك كۇشتەردىڭ وپەراتيۆتىك باسقارۋىن بەرۋ قاجەت دەپ ەسەپتەيدى.
Yonhap اگەنتتىگىنىڭ حابارلاۋىنشا، لي ءوزىنىڭ سايلاۋالدى ناۋقانىندا يۋن سوك ەل باسقارعان «ساتقىن كۇشتەردى» باسامىز دەپ ۋادە بەرگەن. بۇل يۋن سوك ەلدىڭ يمپيچمەنتىنەن كەيىن ايتىلعان مالىمدەمە بولاتىن.
2025 -جىلعى 3 -ماۋسىمدا وڭتۇستىك كورەيادا پرەزيدەنتتىك سايلاۋ ءوتتى. باستاپقىدا بۇل سايلاۋ 2027 -جىلعا جوسپارلانعان بولاتىن، الايدا يۋن سوك ەلدىڭ قىزمەتىنەن شەتتەتىلۋىنە بايلانىستى مەرزىمىنەن بۇرىن وتكىزىلدى. 2025 -جىلعى 4- ساۋىردە كونستيتۋتسيالىق سوت ونىڭ يمپيچمەنتىن بەكىتتى.
بۇل جولى سايلاۋدا جەڭىسكە جەتكەن ۇمىتكەر داۋىس بەرۋ ناتيجەلەرى رەسمي تۇردە راستالعاننان كەيىن بىردەن پرەزيدەنتتىك قىزمەتكە كىرىسەدى.
