ۇلى بريتانيالىق ەنەرگەتيك العاشقى بولىپ Neo Nomad ۆيزاسىن الدى
الماتى. KAZINFORM – ۇلى بريتانيالىق ەنەرگەتيك سەرتاچ يەنەر ۆيزانىڭ جاڭا ءتۇرى - Neo Nomad Visa-نى ءبىرىنشى بولىپ الدى. كۋالىك شەتەلدىك مامانعا ب ا ءا - دەگى قازاقستان ەلشىلىگىندە بەرىلدى.
ۇلى بريتانيا ازاماتى قازاق تىلىنە قىزىعۋشىلىق تانىتىپ، قازاقستاننىڭ مادەنيەتىمەن، تابيعي لاندشافتتارىمەن جانە گاسترونومياسىمەن جاقىنىراق تانىسۋدى جوسپارلاپ وتىر. Neo Nomad ۆيزاسىن يەلەنگەن سەرتاچ يەنەر جاقىن ارادا قازاقستانعا كەلەدى. وعان قازاقشا سويلەۋ مانەرى بۇرىننان تانىس ەكەن. بريتاندىق ساراپشىنىڭ قىزى چيكاگو ۋنيۆەرسيتەتىندە «قازاق ءتىلى جانە ورتالىق ازيا زەرتتەۋلەرى» ماماندىعى بويىنشا ءبىلىم العان.
- قازاقستان - تاڭعاجايىپ ەل! Neo Nomad Visa باعدارلاماسى ارقىلى ءبىز وسى ەلدە ءبىر جىلعا دەيىن بولۋ مۇمكىندىگىنە يە بولدىق. بۇل ۆيزا مەنىڭ شەتەلدەگى كومپانيامدا قاشىقتان جۇمىس ىستەۋىمە جانە قازاقستاندى تانىپ-بىلۋگە، تابيعاتىمەن، دوستىق اتموسفەراسىمەن، اسحاناسىمەن، مۋزىكاسىمەن، داستۇرىمەن، تىلىمەن تانىسۋعا جول اشتى. قىزىمنىڭ ارقاسىندا مەن ءبىرشاما ۋاقىتتان بەرى قازاق ءتىلىنىڭ اۋەزدىلىگى مەن بايلىعىن ەستىپ ءجۇرمىن، - دەدى سەرتاچ يەنەر.
اتاپ وتكەن ءجون، Neo Nomad Visa مەملەكەت باسشىسىنىڭ تاپسىرماسى بويىنشا تۋريزم جانە سپورت، سىرتقى ىستەر، سيفرلىق دامۋ، ىشكى ىستەر مينيسترلىكتەرىنىڭ جانە «Kazakh Tourism» ۇلتتىق كومپانياسىنىڭ قاتىسۋىمەن قولدانىسقا ەنگىزىلدى. بۇل ۆيزا شەتەلدىك تۋريستەر وزدەرىنىڭ شەتەلدەگى كومپانيالارىندا قاشىقتان جۇمىس ىستەۋگە جانە قازاقستاندا ءبىر جىلعا دەيىن تۇرۋعا مۇمكىندىك بەرەدى. جاڭا ۆ12-1 ۆيزاسىن الۋ ءۇشىن شەتەلدەگى قازاقستان ەلشىلىگىنە نەمەسە كونسۋلدىق مەكەمەلەرىنە جۇگىنۋ قاجەت.
ەسكە سالايىق، بۇعان دەيىن قازاقستاندا زاماناۋي كوشپەندىلەرگە ارنالعان جاڭا Neo Nomad ۆيزاسى ەنگىزىلگەنىن جازعانبىز.
سونداي-اق Neo Nomad Visa شەتەلدىكتەرگە قانداي مۇمكىندىك بەرەتىنىن جازعان ەدىك.
اۆتور
دوسبول اتاجان
