ۇلى بريتانياداعى وتانداستارىمىز داۋىس بەرىپ جاتىر

لوندون. KAZINFORM – ۇلى بريتانياداعى قازاقستان ەلشىلىگى جانىندا ورنالاسقان سايلاۋ ۋچاسكەسىندە رەفەرەندۋم ەندى باستالدى. ويتكەنى لوندون استانا ۋاقىتىنان 4 ساعات ارتتا، دەپ حابارلايدى Kazinform ءتىلشىسى.

376-سايلاۋ ۋچاسكەسى قازاقستاننىڭ ۇلى بريتانياداعى ەلشىلىگىنىڭ عيماراتىندا ورنالاسقان. ۋچاسكەدە قازاقستاننىڭ جانە ۇلى بريتانيانىڭ تۋلارى، ورتاسىندا داۋىس بەرۋ جاشىگى تۇر. سايلاۋ كوميسسياسىنىڭ مۇشەلەرى ەرەجەلەردىڭ تولىق ساقتالۋىن قامتاماسىز ەتىپ وتىر.

جالپى ءبىرقاتار وتانداسىمىز داۋىس بەرۋگە نيەتتى ەكەندىكتەرىن ايتىپ، ۋچاسكەگە الدىن الا تىركەلگەن. باسىم كوپشىلىگى ستۋدەنتتەر قاۋىمى جانە ولاردىڭ بەلسەندىلىگى وتە جوعارى. ءبىرىنشى بولىپ كەلگەن داۋىس بەرۋشىگە ەلشىلىك تاراپىنان سىيلىق بەرىلدى.

«مەن ءبىرىنشى كۋرس ستۋدەنتىمىن. ۆەستمينستەر ۋنيۆەرسيتەتىندە IT ماماندىعى بويىنشا ءبىلىم الىپ جاتىرمىن. بۇگىن ومىرىمدە ءبىرىنشى رەت جانە لوندوندا ءبىرىنشى بولىپ داۋىس بەرۋگە كەلدىم. كونستيتۋتسيالىق قۇقىعىمدى جۇزەگە اسىرۋ مەن ءۇشىن ۇلكەن مارتەبە»، - دەدى الىشەر قارامان.

داۋىس بەرۋشىلەردىڭ قاتارىندا تەك ۇلىبريتانيا قازاقتارى عانا ەمەس، رەدينگ، مانچەستەر، ابەردين، گلازگو قالالارىندا ۋاقىتشا نەمەسە تۇراقتى تۇرىپ جاتقان وتانداستارىمىز، وسىندا ساياحاتتاپ جۇرگەن تۋريستەر دە كوپ.

ادەتتە داۋىس بەرۋشىلەردىڭ سانى تاڭەرتەڭگى ۋاقىتقا قاراعاندا تۇسكە تامان ارتادى. ويتكەنى ۇلى بريتانيانىڭ تۇكپىر-تۇكپىرىنەن جينالعان قازاقستاندىقتار لوندونعا سول كەزدە جەتەدى.

ەلشىلىك داۋىس بەرۋ پروتسەسىنە قاتىسۋشىلاردىڭ قاۋىپسىزدىگىن قامتاماسىز ەتۋ ماقساتىندا جەرگىلىكتى پوليتسيامەن ىنتىماقتاستىقتا جۇمىس ىستەپ جاتىر.

تاڭەرتەڭ 7 دە اشىلعان داۋىس بەرۋ ۋچاسكەسى كەشكى 8 گە دەيىن جالعاسادى. ودان كەيىن سايلاۋ كوميسسياسىنىڭ مۇشەلەرى داۋىستاردى ساناۋ پروتسەسىنە كىرىسەدى. ۋچاسكە جابىلعاننان كەيىن 1-2 ساعاتتىڭ كولەمىندە لوندونداعى رەفەرەندۋم ناتيجەلەرى بەلگىلى بولادى. ساياسي ماڭىزى بار ناۋقاننىڭ الدىن الا ناتيجەلەرى ەرتەڭ حالىققا جاريا ەتىلمەك.